Баражот за опстанок Силекс - Беласица в недела во Скопје

Со неделните бараж-натпревари за опстанок во Првата фудбалска лига меѓу Силекс и Беласица, односно меѓу Башкими и Миравци, како и со трите квалификациски натпревари за влегување во Втората лига, ќе заврши годинашново фудбалско првенство на Македонија. Во баражот за опстанок во прволигашкото друштво Силекс и Беласица ќе играат во Скопје на Градскиот стадион додека Башкими и Миравци ќе се сретнат на стадионот под Тумбе кафе во Битола в недела на 8 јуни.

Вчера беше извршена и ждрепката за трите квалификациони двојки за пополнување на Втората фудбалска лига, во која ќе играат прваците на петте региони плус Локомотива од Скопје, која мора да игра бараж за опстанок во Втората лига.

Според ждрепката се среќаваат: во Кавадарци Локомотива - Осогово (Кочани), во Струмица Лепенец (Скопје) - Новаци, и во Прилеп ќе играат Кожув (Гевгелија)-Љуботен (Тетово). Победниците од овие три средби ќе станат нови членови на Втората лига која од есен ќе брои 16 клубови. Овие мечеви се играат в сабота на 7 јуни. Почеток на натпреварите е во 16.30 часот. Доколку во регуларното време средбите завршат без победник, ќе се играат продолженија од 2х15 минути, а доколку и тогаш не биде познат победникот, ќе се изведуваат пенали. (М.М.)