Суви славини по неколку часа

КАВАДАРЦИ - И ова лето почна рестрикција на водата за пиење во Кавадарци. Од ЈП „Комуналец“ велат дека се принудени да воведат рестрикции бидејќи е забележана зголемена потрошувачка. Славините се суви дневно по два часа, во периодот од 12 до 14 часот, а ноќе пет часа од 24 до 05 часот.

За време на рестрикцијата ќе се врши полнење на резервоарите. Воедно „Комуналец“ апелира до сите граѓани совесно и одговорно да ја користат санитарната вода. За несовесните ќе се преземаат санкции.

Кавадарчани ги револтира ваквата информација, велат дека не е в ред да останат по неколку часа без вода. Тие прашуваат зошто продолжува практиката од минатите години да остануваат жедни и покрај тоа што плаќаат значително поскапа вода споредено со минатиот период.

Граѓани од улицата „Илинденска“ во централното градско подрачје се пожалија дека два дена останале без вода за пиење и по повеќе од 5 часа, иако од „Комуналец“ најавуваат дека рестрикцијата ќе трае само два часа. (А.Д.)