Истражување на ГФК

Мозоците заминуваат за подобра работа

Во 2012 година постои ризик од одлив на високообразовни кадри, особено од дејностите истражување и развој

Повеќе од четвртина работници од 29 земји во светот се подготвени да заминат во странство во потрага по подобра работа, покажуваат анализите на компанијата за истражување на пазарот, ГФК. Исто толку планираат да го напуштат својот работодавец во 2012 година. Ова значи дека земјите што се' уште закрепнуваат од глобалната рецесија може да станат „дух-градови“ кога станува збор за вработеноста во нив.

„Во годината што доаѓа постои ризик на одлив на високообразовни кадри, особено од дејностите истражување и развој. Една четвртина од работниците што работат физичка работа и од службениците што имаат канцелариска работа се подготвени да бараат работа во странство, а таа бројка расте кај високообразованите работници”, вели Боге Божиновски од ГФК Скопје.

Оттаму нагласуваат дека компаниите треба сериозно да пристапат кон мотивација и ангажман на ��работените, бидејќи тоа заедно со задоволството на нивните клиенти и финансискиот резултат се трите најважни работи. Од ГФК предупредуваат дека компаниите треба да бидат загрижени, бидејќи стекнувањето или обучувањето на еден нововработен, можеби, чини и десет пати повеќе отколку задржувањето на постојниот кадар.

Состојбите во Македонија се пооптимистички. Cамо со 18 отсто од работниците што активно бараат да ги променат работодавците, Македонија се соочува со значително постабилнаa средина на задржување на вработените. Но, истражувањето не содржи податоци колку од нив се подготвени да заминат во странство.

„Бројот на мултинационалните компании тука не е голем за да овозможи  преместување на вработените во рамките на истата компанија. Доколку одовде барате работа во ЕУ, постојат низа регулативи што не ги исполнувате, значи можностите не се така големи за да постои масовен одлив на вработени во други држави“, објаснува Божиновски.

Останува вистината дека за многумина вработени преселбата во друга земја веќе не им влева страв за разлика од промената на самата компанија. Компаниите бараат да го привлечат, да го ангажираат и да го задржат најдобриот персонал во одмерувањето на силите не само на конкурентите на пазарот во нивната земја, туку и од цел свет.

Инаку, голем број европски земји веќе ги отворија своите врати за високообразовен кадар од странство. На пример, во Германија им се дава можност на домашните претпријатија да вработуваат странски инженери и лекари.

Меѓународното истражување на ГфК за ангажираноста на вработените лица го реализира меѓународната компанија за истражување GfK Custom Research. Вклучени се мислењата на 30.556 возрасни вработени во 29 земји што беа интервјуирани онлајн или телефонски во периодот меѓу 8 февруари и 4 април оваа година. (К.Ч.)