„Тигри“ ги спасиле Финците

Туристите не носеле спасувачки појаси. За влакно била избегната голема несреќа

БИТОЛА - „Тигри“ ги спасиле финските туристи од невремето во Преспа. За влакно и во вистински момент била избегната голема несреќа. Жителите на Преспа велат дека двата чамца со туристи од островот Голем Град ги носел силен ветер кон Грција. Овие гости не носеле спасувачки појаси, нагласуваат од полицијата.

Вработени од туристичката агенција „Лале турс“ од Охрид, кои се организатори на турата на Финците до Преспа, велат дека целата организација била по желба на клиентите. Меѓутоа, сопственикот на агенцијата категорично одбива да зборува за настанот, под изговор дека би можел да биде злоупотребен, како што рече, за сензационални вести. Сепак, признава дека бил повикан во полиција.

Пред почетокот на туристичката сезона во Преспа и по овој настан голем број прашања остануваат отворени. Пред се', колку се безбедни туристите на копно и во вода. Потоа колку се безбедни пловните објекти? Дали се почитуваат сите мерки за безбедност?

Преспан��и велат дека без добро познавање на езерото секој излет во него е ризик за животот.

Припадници на единицата за специјални задачи на МВР случајно се нашле во спасувачкиот тим откако полицијата од Стење, која била повикана од туристите, за помош побарала асистенција и од „тигрите“. Специјалците веќе неколку недели биле на обука во Преспа, сместени во камповите на МВР, на брегот на туристичката населба Крани.

Спасувањето на осумтемина туристи, државјани на Финска, и двајца Македонци траело повеќе од два часа во водите на Преспанско Езеро. Според полициски информации, спасувачката драма се случила ноќта во саботата спроти неделата. Странците со два метални чамца попладнето во саботата биле однесени на островот. Но, по обиколката на културните знаменитости - христијанските храмови, доцна вечерта ги фатило невреме, а силниот ветер од северозападен правец предизвикал големи бранови. На копно биле однесени дури во неделата рано изутрина во 2,40 часот.

„Екипата од десет луѓе не можеле да се вратат на копно поради силниот ветер и големите бранови. Ги фатило паника. Повикале полиција, а асистирале и „тигрите“ лоцирани во Крани. Двете полициски екипи успеаја безбедно да ги извлечат туристите. Според мои информации, туристите не носеле појаси за спасување на себе“, рече Ѓоко Стрезовски, портпарол на СВР - Битола.

Од туристичката агенција „Лале турс“ не беа расположени да зборуваат за настанот. Сопственикот Димитри само кратко одговори дека се' е покриено преку агенцијата. Но, и тоа дека има други установи и инспекции што би го потврдиле тоа.

Жителите на Преспа со голем интерес и возбудување раскажуваа и прераскажуваа за настанот. Предупредуваат дека прошетките по езеро, но и самото капење во подлабоките води е ризик ако нема придружба од преспанец што добро ја познава областа. Преспанското Езеро е познато по подземните струи, кои беа причина за голем број давења во езерото. Искусните рибари велат дека безбедноста во езерото со пловен објект зависи најмногу од ветрот.

„Странските туристи беа изложени на голем ризик за нивниот живот, бидејќи дента дуваше ветер од северен правец. Тоа значи дека ветерот предизвика големи бранови и во невремето ги носеше чамците кон Грција, накај Нивици. Ситуацијата не била едноставна. Два и пол часа полицијата со „тигрите“ се обидувала да ги спаси луѓето“, вели Љупчо Колунџиевски, рибар од селото Езерани. (А.Б.)