Претходен број

Груевски повика на борба на идеи, а не со оружје

Премиерот Никола Груевски вчера ги осуди сите предизборни инциденти што се случија изминатите денови, вклучувајќи го и завчерашниот, и ги повика сите актери на политичката сцена да го почитуваат договорот што го потпишаа. Груевски порача дека политичката борба мора да има своја смисла и да биде борба на концепти и идеи, а не арена за борба со сила и оружје.

„Сакам да им порачам на сите што учествуваат и се актери во инцидентите дека институциите на системот ќе направат се' што е во нивна моќ да ги запрат и да ги казнат оние кои ќе ги злоупотребат изборите и кои ќе сакаат да ги претворат во некој друг вид арена, а не во политичка. Тоа најдобро го почувствува човекот кој веќе е уапсен, а ќе го почувствува и вториот од завчерашниот инцидент, по кого се трага“, истакна Груевски.

Тој информираше дека вчера разговарал со Мендух Тачи и Али Ахмети, од кои добил потврда дека се подготвени да направат се' што е во нивна моќ да спречат понатамошни инциденти.

„Сакаме да имаме фер избори, бидејќи се обврзавме на тоа. Сакам да им порачам на сите дека никој нема да добие политичка заштита за учество во инциденти, без разлика на тоа дали е од партија на власт или од партија што сака да дојде на власт“, рече Груевски. (С.Н.)