Србија и Хрватска имаат отворени прашања

Нови Сад - Хрватскиот претседател Иво Јосиповиќ изјави дека Србија и Хрватска имаат повеќе отворени прашања, од кои некои не се лесни, истакнувајќи оти должност на оваа генерација политичари е да не ги остави на наредната, туку да ги реши.

Тој како нерешени прашања ги наведе границата, проблемот со исчезнатите, враќањето на одземеното културно богатство, сукцесијата, враќањето на бегалците и различните имотни прашања.

Во интервју за новосадски „Дневник“, Јосиповиќ вели дека директните двострани преговори се секогаш подобри како решение кај деликатните прашања, како што се дефинирање на границата, односно разграничувањето меѓу двете држави.

Тој смета дека повлекувањето на тужбите на Хрватска и на Србија пред Меѓународниот суд на правдата е во надлежност на владите, но оти нема дилеми дека тие ги оптоваруваат односите меѓу двете земји.

„Мојот став е дека тужбите се непотребни доколку дојдеме до договори со кои би се отстраниле причините за нивното постоење“, истакна Јосиповиќ.