Германија може да ја блокира помошта за Грција

Од Грците се бара да се откажат од 13. и од 14. плата што се делеле во приватните фирми

Додека Грците ги очекуваат милијардите за спас, од Германија пристигнуваат најави дека таа држава би можела да ја блокира помошта, доколку Грците претходно цврсто не се обврзат на штедење. Германија добила право на вето при донесувањето конечна одлука за финансиската помош што треба да и' биде одобрена на Грција.

Германскиот министер за финансии Волфганг Шубле соопшти дека неговата земја може да рече „не“ за кредитите за Грција, ако Атина не се обврзе дека во следните години ќе примени строга политика на штедење. Кусо време потоа и германскиот министер за надворешни работи Гидо Вестервеле ја отфрли можноста за отпуштање финансиска помош за Грција, без претходно државата да понуди ефикасна програма за намалување на буџетскиот дефицит. „Прераното давање ветувања за конкретна помош нема да доведе до исчезнување на притисокот врз Грција“, нагласи Вестервеле. „Пред се', треба да се консолидира буџетот во Грција, во спротивно, задолжувањата на Грција нема да се реализираат со неопходната дисциплина“, додаде шефот на германската дипломатија.

Во меѓувреме, Европската комисија и ММФ се' уште го разгледуваат грчкото барање за помош од 45 милијарди евра. Во првата фаза Европската комисија мора да го изнесе својот став и да наведе свое мислење дали барањето на Грција е оправдано, односно да утврди дали земјата нема друг избор освен да бара поддршка од своите партнери и ММФ во добивање заем со разумни камати. При донесувањето конечна одлука за помош на Грција, Германија има право на вето и ако смета дека е потребно ќе може да го блокира активирањето на програмата за помош.

Инаку, Грците, кои, по се' изгледа, се' досега убаво живееле, ќе мора да останат без 13. и 14. плата, што досега се делеле и во приватните фирми. Поточно, претставници на ММФ, Европската комисија и Европската централна банка што преговараат во Атина за пакетот финансиска помош за Грција, побараа од Владата да ги укине 13. и 14. плата во приватниот сектор. Од Грција, како што изјави грчкиот министер за труд Андреас Ловердос, се бара и да ја намали минималната заработувачка што сега изнесува 780 евра.

Тој потврди дека за време на разговорите биле поставени услови од претставниците на ЕУ и на ММФ поради барањето помош од страна на Грција. Но, тој им дал до знаење дека неговото министерство е против укинувањето на двете плати, бидејќи тоа би можело да биде катастрофално за вработените, за пазарот и за осигурителните фондови.

Инаку, грчкиот весник „Вима“ пишува дека Грција е соочена со опасност од ликвидна криза, со оглед на тоа што не може да биде кредитирана од пазарите, а нејзините банки се зависни од Европската централна банка. Имено, грчките банки добиле од ЕЦБ капитал во вредност од 80 до 85 милијарди евра, а банкарите не ја исклучуваат можноста таа сума наскоро да достигне и до сто милијарди евра. Висок банкарски функционер изјавил дека пазарите сметале оти кредитите од 45 до 50 милијарди евра не се доволни за да се реши проблемот со рефинансирање на долгот во вредност од 300 милијарди евра. Весникот додава дека држава како Грција со долг од 115 проценти од БДП не може за три години да успее да го намали буџетскиот дефицит за десет проценти од БДП, како што предвидува стабилизацискиот план на владата. „Вима“ пишува дека на Грција и' се потребни двојно повеќе години, можеби од шест до седум и речиси тројно поголеми средства, од 100 до 120 милијарди евра од ЕУ и од ММФ за излез од кризата. Ова се случува во момент кога берзанските пазари се затворени за грчките банки. Претставници на банките стравуваат дека продолжувањето на таа несигурност може да предизвика бран од истекување на депозити од Грција и да ја доведе земјата до ликвидна криза. Весникот коментира дека проблемот на ликвидноста на банките се пренесува и кон претпријатијата и домаќинствата и доколку тој не биде решен ќе се затворат фирмите и ќе се зголеми невработеноста.

Во врска со тоа весникот прогнозира три сценарија за грчката економија - оптимистичко, лошо и страшно. Според оптимистичкото, помошниот механизам со учество на ЕУ и на ММФ ќе дејствува како штит за земјата и ќе и' овозможи на владата да продолжи со реформите и да ја преструктуира економијата. Во таа смисла се смета дека Грција веќе е под контрола на „Света Тројца“, како што во Атина се нарекуваат ЕК, ЕЦБ и ММФ. Лошото сценарио се сведува на тоа дека пазарите за Грција ќе останат затворени за реалната економија, бидејќи банките би функционирале со „ликвиден кислород“ од ЕЦБ, а големиот бизнис ќе нема пристап до меѓународното финансирање. Тоа би довело до уште подлабока рецесија и неуспех на владиниот стабилизациски план. Страшното сценарио предвидува дека и покрај активирањето на помошниот механизам може да дојде до излевање на кризата надвор од границите на Грција и да опфати други земји од европскиот југ. И државите од Г-20 почнаа консултации во врска со развојот и со можните последици од финансиската криза во Грција. Независни аналитичари говорат за износ од 90 милијарди евра, кој, според нив, е минимумот неопходен за среднорочно решавање на финансиските проблеми на земјата.

Инаку, „Фајненшел тајмс“ пишува дека оваа недела е клучна за расчистување на ситуацијата околу економскиот и финансискиот колапс на Грција и положбата во целата зона на заедничката европска валута еврото. Станува збор, како што забележува весникот, за најголемиот и најтешкиот предизвик со кој се соочува европската монетарна унија во својата 11-годишна историја и за тоа дали до петок ќе може да се стави под контрола грчката криза со огромните внатрешни долгови што не може земјата сама да ги покрива или таа ќе се рашири по целата еврозона, напаѓајќи ја прво Португалија. (Според агенциите)