Фуере: Владата да го реши проблемот со невработеноста

Намалувањето на буџетските средства за нови работни места е поразително за економијата, се наведува во извештајот на ЕК

Маја Томиќ


Невработеноста останува главен проблем за кој Владата треба да бара решенија, но поддршката што им ја дава на малите и на средните претпријатија за да можат да отвораат работни места, сепак, е недоволна. Секоја година се намалуваат средствата за помош на фирмите за вработување, односно за отворање нови работни места. Со новиот буџет, пак, овие средства уште повеќе се намалени, со што ќе се обесхрабрат дополнително младите лица што се без работа. Тоа е поразително за секоја економија.

На оваа забелешка, дадена во извештајот на ЕК, укажа вчера евроамбасадорот Ерван Фуере, на годишното Собрание на Европската бизнис-асоцијација, ЕБА.

„Земете го добриот пример со Словенија, каде што малите и средните фирми се поттикнуваат од државата со разни мерки и тие апсорбираат најголем процент од вработените. Факт е дека единствено овој сектор може да придонесе за намалување на високата стапка на невработеност во Македонија, која е над 30 отсто и е највисока во Европа“, потенцира Фуере и посочи дека Владата треба да му обрне поголемо внимание на овој проблем, и да не го амортизира високиот процент на невработени преку зголемувањето на вработувањата во јавниот сектор и одобрувањето на работењето во неформалниот сектор.

„Не е добро што за в година се предвидуваат помалку средства за активните политики на пазарот на трудот. Пред државата стојат големи предизвици за да се справи со проблемот со невработеноста. Но, таа има капацитет и треба да се зафати со работа на тоа поле, заедно со деловната заедница“, препорача Фуере.

Министерот за економија, Фатмир Бесими, укажа дека деловните субјекти заедно со Владата имаат активен пристап во носењето одлуки во насока на подобрување на бизнис-климата. Тоа е со цел да се приближи бизнисот до европските пазари и да се привлечат што повеќе странски инвестиции.

Вицепремиерот Владимир Пешевски потсети на три клучни реформи што досега се спровеле како резултат на меѓусебната соработка меѓу ЕБА и Владата. Тоа се регулаторната гилотина, антикризните мерки и намалувањето на казните за фирмите.

Според претседателот на ЕБА, Гинтер Офнер, ЕУ треба да ја поддржува Македонија на нејзиниот пат кон Европа, а ЕБА ќе го продолжи дијалогот со Владата за да се подобрат условите за бизнис и на тој начин да се креираат нови работни места.

„Во иднина треба да се концентрираме на подобрување на судството и на општата рамка во која функционира бизнисот, со цел да се зголемат растот и инвестициите“, изјави Офнер.