„Оне“ ги откупи акциите на „Он-нет“

Телекомуникацискиот оператор „Оне“, подружница на „Телеком Словенија“, договори откуп на 16,62 процента акции на „Он-нет“ од сопственикот на овој провајдер, Предраг Чемерикиќ.

„Оне“ соопшти дека „Телеком Словенија“ останува доминантен сопственик. Дел од откупнината ќе биде платена веднаш, а остатокот ќе се исплаќа врз основа на растот на бројот на ДВБТ-корисници во согласност со плановите на компанијата.

„Овој договор овозможува консолидација, односно спојување на сите македонски компании што, всушност, беше целта на „Телеком Словенија“ со купувањето на „Оне“. „Он-нет“ ќе биде формално правно анектиран на „Оне“ во најкус можен рок, додека формално правното припојување на „Оне ту Оне“, поранешен „Германос“, е исто така во тек, се вели во соопштението.

Во почетокот на следната година сите македонски подружници на „Телеком Словенија“ треба да бидат интегрирани во „Оне“ што ќе овозможи побрза консолидација и поефикасно работење. (А.С.)