Нема волја за борба против корупцијата

„Во Македонија има добри предуслови за борба против корупцијата и солидна правна рамка. Но, прашање е колку им се дава капацитет на институциите за антикорупциска борба. Во моментов кај нас нема многу политичка волја за борба против корупцијата“, истакна претседателот на Државната комисија за спречување на корупцијата, Илми Селами, на вчерашната промоција на извештајот за борба против корупцијата и организираниот криминал во Бугарија „Злосторство без казна“.

Во овој документ што го реиздаде Македонскиот центар за меѓународна соработка се констатира забавување на борбата против корупцијата откако Бугарија влезе во ЕУ и зголемено коруптивно дејствување на носителите на централната и на локалната власт. „Загриженоста на граѓаните за корупцијата во Бугарија е на прво место во анкетите, а кај нас на второ или на трето, што не значи дека тука е нешто подобро“, смета Селами.

Според него, граѓаните треба да преземат мерки да се самоорганизираат во борбата против корупцијата, бидејќи институциите немаат доволно капацитети и средства за да се борат самостојно. Селами истакна дека главна цел на ДКСК е да се одржи кондиција за борбата против корупцијата и постојано да се доусовршува легислативата за таа намена. Селами побара Антикорупциска комисија да добие право за давање мислење за сите законски проекти што ќе се однесуваат на корупцијата и на борбата против неа. „Давањето мислење ќе помогне да се лекуваат работите во тек, а не по нивното донесување“, објасни Селами. (Д.Р.)