Поскапе возењето во такси во Скопје

Во иднина такси ќе чини 20 денари старт и 25 денари за секој изминат километар

Сања Наумовска


Поскапе возењето со такси во Скопје. По жестока дискусија, Советот на Град Скопје вчера реши цената на такси-превозот во иднина да биде 20 денари за старт и 25 денари за секој изминат километар, наместо предложените 40 денари за старт и 25 денари за километар. На гласањето му претходеше жестока расправија меѓу советниците од власта и од опозицијата. Дискусиите на моменти се претвораа во политички препукувања, кои се движеа од расправа за имињата на партиите до расправа која партија за колку поскапувања е виновна.

Дискусијата по одлуката започна со образложението на претседателот на Комисијата за сообраќај, Игор Гиевски, дека документот е почетна основа за средување на хаосот во такси-сообраќајот во главниот град. Според него, поскапувањето може да се разбере како еден вид компензација за обвр��ките што им се наметнуваат на таксистите со новата одлука. Имено, секој лиценциран возач на такси ќе треба да го префарба возилото во бела боја со жолта хауба и багажник. Компаниите ќе мора да се откажат од своите обележја и да ја унифицираат таблата. Ќе бидат задолжени на своите возила да стават налепници со обележја на Градот Скопје и соодветен број на возилото. На тој начин, би требало и визуелно да се одвојат од дивите таксисти што возат без лиценци.

„Одлуката е прифатлива за сите учесници во превозот. Таа е почетна основа да се внесе ред и мора да биде прифатена од таксистите. На граѓаните мора да им понудиме квалитетен превоз и не смее да има компромиси околу безбедноста на превозот. Борбата со дивите таксисти почнува сега, а одлуката е првиот чекор“, рече Гиевски.

Според реакциите на советниците од опозицијата, зголемувањето на цената ќе ги избрка граѓаните од такси-возилата и ќе ги остави таксистите без работа, а од друга страна, нема да го реши проблемот со дивите превозници. Според советникот Александар Наумовски од СДСМ, Скопје нема добар алтернативен превоз, бидејќи автобусите на ЈСП се во катастрофална состојба, а од проектот за трамвајот нема ниту Т. Со поскапувањето на такси-превозот и услугата што досега им беше достапна, сега им се одзема на скопјани. За Наумовски, решавањето на проблемот со дивите таксисти е работа на полицијата, која поседува инструменти што Градот ги нема.

На ова одговорија советниците од власта, кои нагласија дека таксито е луксузен превоз од врата до врата, па време е трендот од Европа да дојде и кај нас. Одлуката ќе биде еден вид заштита на градското јавно претпријатие, бидејќи таксистите по старата цена досега беа конкуренција на ЈСП. Одлуката и за градоначалникот Коце Трајановски, по чиј предлог цената се намали од 40 на 20 денари за старт, не е идеална, но важно е дека е направена на транспарентен начин.

„Целта е оние што живеат од такси-превоз да бидат заштитени, а граѓаните во иднина да бидат безбедни и да знаат со кого се возат“, рече Трајановски.

Со одлуката се ограничува бројот на превозници на 3.000, а се уредува и користењето на такси-стојалиштата во Скопје. (С.Н.)