Унијата никогаш не рекла дека името е пречка за членство

Европската унија, за разлика од НАТО, никогаш експлицитно не посочила дека името е пречка за зачленување на земјава во европското семејство. Ова е став на новиот британски амбасадор, Кристофер Ивон, во контекст на претстојниот ноемвриски извештај на ЕК за Македонија. Според него, извештајот ќе биде избалансиран и веродостојно ќе го одразува напредокот на земјата и она што е неопходно да се стори во иднина, но дека решението за името не е еден од предусловите за членство, туку реформите за хармонизација со стандардите во ЕУ. „ЕУ никогаш не посочи јасно дека тоа е пречка. НАТО беше поексплицитен во своето изјаснување за потребата од решавање на името, но ЕУ не даде таква оцена“, рече Ивон, охрабрувајќи ја притоа Македонија на патот на реформите.

Ивон не сакаше да шпекулира за содржината на претстојниот извештај на ЕК ниту дали е можно Македонија да добие датум за почеток на преговорите без да го реши името. „Се надевам дека Македонија ќе може да слави за постигнатиот прогрес што ќе се одрази во извештајот, но и дека ќе ги сфати сериозно сугестиите“, изјави тој по отворањето на втората годишна конференција на мрежата сектори за управување со човечки ресурси во државната служба, која се спроведува со помош од британската амбасада.

За вицепремиерот Васко Наумовски проширувањето не е само одговорност на земјите-кандидати, туку и на самата ЕУ. Според него, проблемите што ќе се појават при проширувањето се заедничка одговорност на земјите кои сакаат да станат членки и на институциите на ЕУ. Запрашан дали Владата ќе побара посредништво од ЕУ во спорот околу името, тој одговори дека сите институции на ЕУ што имаат надлежност околу заедничката надворешна и безбедносна политика и околу проширување се запознати со преговарачкиот процес и доколку тие дадат свој придонес, Македонија ќе биде благодарна. (Н.Р.)