Иницијатива за кривично гонење на Спасеновски

Истрагата за случајот со хидросистемот „Злетовица“ што ја водеше Антикорупциската комисија изминатите месеци заврши со иницијатива за кривична одговорност на поранешниот министер за земјоделство, Ацо Спасеновски. Откако ги прочешлале сите информации и документи што ги имале на располагање, антикорупционерите заклучиле дека има потреба од ваква завршница. Се разбира, конечниот збор околу одговорноста на Спасеновски го има Обвинителството до кое барањето ќе стигне најдоцна до среда.

„Клучен момент да поведеме иницијатива за кривично гонење е писмената препорака со која Ацо Спасеновски од позиција на тогашен министер ја ангажирал фирмата ‘Силекс неметали‘ како подизведувач на работите во хидросистемот ‘Злетовица‘. Странските консултанти оцениле дека фирмата не ги исполнува условите и одбиле да ја ангажираат поради неискуство во оперативните работи на терен. Но, Спасеновски, сепак, овозможил ‘Силекс неметали‘ да се вклучи во бизнисот“, изјави вчера за „Утрински весник“ шефот на Државната комисија за спречување на корупцијата, Илми Селами.

И додека случајот „Злетовица“ се тркалаше, власта го награди Спасеновски со амбасадорско место во Украина. Заминувањето во дипломатијата се случи многу брзо по обелоденувањето на скандалот. (К.Ч.)