Македонија во Меѓувладиниот комитет на УНЕСКО

Република Македонија стана членка на Меѓувладиниот комитет на УНЕСКО за заштита и унапредување на разноликоста на културните изразувања. Оваа одлука била донесена на третата редовна седница на Конференцијата на државите - членки на Конвенцијата за заштита и унапредување на разноликоста на културните изразувања која од 14 до 17 јуни 2011 година се одржа во седиштето на УНЕСКО во Париз, Франција. Како што соопштуваат од Министерството за култура „по постигнатиот консензус, во втората електорална група бил потврден изборот на Република Македонија и Ерменија, со мандат од 4 години.“

Инаку, Република Македонија ја ратификуваше Конвенцијата на УНЕСКО за заштита и унапредување на разноликоста на културните изразувања на 2 април 2007 год. и го депонираше инструментот за ратификација до УНЕСКО на 22 мај 2007 год., со што Република Македонија ја потенцираше својата цврста определба за модерен пристап во заштитата и унапредувањето на културните изразувања, како и во создавањето услови за зајакнување на меѓународната соработка во областа на културата. (Н.П.)