Изложба на Мирослав Стојановиќ-Шуки

Во Отвореното графичко студио при Музејот на град Скопје вечерва во 20 часот ќе биде отворена изложба на ликовниот уметник Мирослав Стојановиќ-Шуки, под наслов „Print on black- No good will come of this“. Ќе бидат презентирани 20-ина монотипии печатени во Графичкото студио кои се и доработувани во различен обем во текот на изминатите неколку месеци. Оваа осма самостојна изложба на авторот (кој досега учествувал на бројни групни изложби во земјава и во странство) во целост е посветена на необјавената збирка на поезија на неговиот драг пријател Џабир Дерала, а некои дела содржат цитати од неа.

Мирослав Стојановиќ-Шуки е роден во 1963 во Ниш, Србија. Дипломирал на ФЛУ во Скопје во класата на проф. Ристо Калчевски. Некогашен член е на групата ЗЕРО. Живее и работи во Скопје. (К.Б.)