Претходен број

Скопје и Атина молчат за предлогот

Нимиц во август ги чека мислењата на властите во двете држави

Тамара Грнчароска

Државниот врв во средата вечерта заседаваше во Кабинетот на претседателот на Македонија, разгледувајќи го новиот предлог кој посредникот од ОН во спорот со името, Метју Нимиц, им го врачи еден ден претходно. Според соопштението од Кабинетот на претседателот Ѓорге Иванов, на средбата на која присуствувале премиерот Никола Груевски, шефот на дипломатијата, Антонио Милошоски, вицепремиерот Адеми и преговарачот во спорот, Зоран Јолевски, биле разменети мислења и информации од одделните средби што ги имаа со посредникот. „Внимателно беа разгледани идеите предложени од страна на медијаторот Нимиц, при што се отвори првична дискусија за нив“, се наведува во соопштението, информирајќи дека се дискутирало и за искажаното очекување од Нимиц во текот на август да ги слушне размислувањата на властите во двете држави во врска со начините и можностите за изнаоѓање прифатливо решение.

На средбата, државниот врв нагласил дека за решението прифатливо за македонската и за грчката страна граѓаните на Македонија би се изјасниле на референдум. Тие ја повториле и политичката волја за надминување на разликите околу името.

Ова вчера, во интервју за агенцијата МИА, го повтори и преговарачот Јолевски, кој вели: „Внимателно ги разгледуваме и анализираме предложените идеи и преку натамошни консултации и координации ќе продолжиме посветено во процесот“. Јолевски нагласува дека при барањето решение, „треба да се заштити дигнитетот, идентитетот и интегритетот на македонските граѓани“. Јолевски во интервјуто не ги открива и не сака да коментира што содржи новиот предлог на Нимиц, единствено велејќи дека „Нимиц претпочита двете страни внима��елно да ги анализираат неговите последни предлози за надминување на разликите околу името“.

„Пуштањето во јавноста детали што не се финално договорени само може да му наштети на процесот“, вели Јолевски, според кого, исто така, мошне битно е да има единство и кохезија во Македонија, затоа што ова прашање е особено значајно за граѓаните.

Грчката шефица на дипломатијата, Дора Бакојани, вчера, пак, пред парламентарната Комисија за национална одбрана и надворешни работи, еден ден по посетата на Нимиц на Атина, го повтори ставот дека Грција е подготвена за заемно прифатливо решение на спорот со Скопје за името, но како сложено име со географска определница за севкупна употреба. Пред Комисијата рекла дека 2009 година е решавачка година за сите важни прашања од надворешната политика на Грција. За предлозите на Нимиц коментарот на Бакојани бил дека грчката страна ќе го информира посредникот за мислењето по последните промени, изразувајќи надеж оти и македонската страна ќе го направи тоа.