Петигру се самоубил со предозирање

Првакот на 400 м од СП 1991, кој подоцна призна дека се допингувал, зел средство за заспивање

Некогашниот светски шампион на 400 м, Антонио Петигру, почина во август од преголема доза антихистамин, стои во извештајот на државната аутопсија. Смртта е оквалификувана како самоубиство со „дифенхидраминско труење“.

„Смртоносно количество дифенхидрамин е утврдено во средишните и во периферните крвни примероци“, тврди аутопсијата.

Петигру (42) беше помошник тренер за атлетика на универзитетот „Северна Каролина“ и учесник на Олимписките игри 2000, кому му беше одземен златниот медал во штафетата 4 х 400 м откако призна дека се допингувал. Тој беше и светски првак на 400 м од 1991 година.

Петигру беше најден во неконтактибилна состојба од пријателите на задното седиште од неговото возило во руралниот централен дел на Северна Каролина на 10 август. Празно шишенце со средство за заспивање беше најдено во автомобилот, стои во извештајот од истрагата. Антихистаминот дифенхидрамин често се користи како помош за заспивање и за лекувањето алергии. Покрај во освојувањето на олимпиското злато, Петигру им помогна на САД да стигнат и до три светски титули во штафетите 4 х 400 м. Тој ги врати златото од ОИ и два од мундијалските златни медали во штафетните трки откако призна дека користел стимулативни супстанции.

„Тој и' рекол на сопругата да се моли“, пишува во извештајот од истрагата во врска со телефонскиот повик од Петигру еден ден пред да биде најдено неговото тело.