Иницијативноста на Владата не влева оптимизам за името

Дали некои идни разговори со Грција може да добијат поголема доза на искреност и реалност, наспроти досегашните средби исполнети со премногу виртуелни елементи

Наум Котевски



Дали фрлената ракавица од македонската влада до Грција за динамизирање, не само на комуникацијата, туку и на соработката на повеќе нивоа, како и реакцијата од Атина дека е време за суштински напредок, а не само за фотографирање, можат да го тргнат од рингот фрлениот пешкир од двете страни. Или дали некои идни разговори меѓу двата соседа за проблемот со името можат да добијат поголема доза на искреност и реалност, наспроти досегашните средби усложнети со премногу виртуелни елементи.

Размислувањата на поупатените одат во насока на тоа дека секоја иницијатива, во период на драстично нарушени односи, е добре дојдена, иако, навидум, спектакуларноста што ја содржи оваа најновата не може да донесе кој знае каков оптимизам за брзо решение на спорот.

Експремиерот Владо Бучковски вели дека покажувањето добра волја од страна на македонската влада не треба да се дочека на нож и дека несомнено треба да следи период на градење меѓусебна доверба. Тој во придвижувањата меѓу Скопје и во Атина, всушност, гледа поместување зад официјалната сцена.

„Не сум оптимист, но добра е каква било иницијатива. Мислам дека последните случувања покажуваат дека притисокот од меѓународниот фактор, особено од Вашингтон, е посилен и кон Македонија и кон Грција“, посочува Бучковски.

Предлогот на македонската Влада за потпишување декларација за пријателство и соработка, основање заеднички образовно-историски комитет, потпишување рамковен предлог за унапредување на билатерални��е односи, основање заеднички комитет кој ќе биде составен од претставници на министерствата за внатрешни работи на двете земји, регулирање на економската соработка преку склучување договор за одбегнување на двојното оданочување... за Бучковски е спектакуларен и со него, како што вели, практично се нуди нешто што треба да го задоволи интересот на оние кои го туркаат процесот.

Амбасадорот Ристо Никовски смета дека постојано треба да поставуваме прашања, особено по самитот во Чикаго, каде, како што додава, ни е поставен јасен ултиматум - првин името, па влез во НАТО.

„Секоја иницијатива е позитивна. Мора да бараме нови патишта и начини за решавање на спорот, иако мора да се води сметка дека нема решение додека Грција е во криза“, смета Никовски.

Во однос на ставот на Бучковски дека меѓународниот фактор го зголемува притисокот, Никовски вели дека Грција не е под притисок. „За разлика од нив, ние сме во едно менгеме и оставени сме во безизлез, практично самите да капитулираме“.

Во својот одговор на предлозите на македонската влада, портпаролот на министерството за надворешни работи на Грција, Григорис Делавекурас, свесно, или не, направи граница меѓу конструктивноста на вицепремиерката за евроинтеграции Теута Арифи и, како што ги нарече, бескомпромисните политики на Груевски.

„Од посетата на вицепремиерката Арифи во Атина е почната соработка меѓу двете држави на технократско ниво за европски прашања. Освен посетата на Арифи и актуелниот шеф на дипломатијата, Димитрис Аврамопулос, додека беше министер за одбрана во владата на Лукас Пападимос се сретна со неговиот македонски колега Фатмир Бесими. Овие средби се показател дека кога Грција гледа соговорник подготвен за суштински разговори и напредување покажува спремност за соработка и презема иницијативи за средби и разговори“, рекоа од грчкото МНР.

По изјавата на Делавекурас, вчера дојде реакција од македонското МНР: „Македонија е заинтересирана за водење директен, суштински и конструктивен дијалог со Грција, со цел надминување на сите реални и наметнати бариери што ги оптоваруваат односите меѓу двете земји. Во тој контекст, Македонија изразува целосна подготвеност и добра волја за искрен и содржаен пристап во дијалог на секое ниво, секое место и во секој контекст ја реафирмира македонската позиција за дијалог со Грција“, се наведува во изјава за МИА на портпаролот на МНР, Борче Стамов.

Според Бучковски, јасна е тенденција на Грците да го насочат проблемот кон ВМРО-ДПМНЕ и Груевски и да покажат дека во владата, сепак, има министри кои се конструктивни.

„Можеби и не се далеку од вистината. Јас кога бев премиер немаше никакви проблеми во комуникацијата и имаше далеку попозитивна клима и во секој поглед наоѓавме партнер во Грција. Инаку, таму од поодамна е создадена перцепција дека Груевски е националистот со кого не може да се преговара“, вели Бучковски.

Никовски, пак, во овој контекст на драматичен начин побара внимателност од Владата. „Тоа претставува подметнување кукавички јајца. Доколку постои предлог за нова средба со албанскиот дел од владата, треба енергично да се одбие. Работата е едноставна како, да речеме, во фудбалот. Ако имате слабо лево крило, противникот ќе се обиде од таа страна да ве напаѓа и да поентира. Крајно време е да не бидеме наивни на тие пионерски дипломатски игри“, резонира Никовски.