ССМ на Први мај нема да протестира

Сојузот на синдикати на Македонија утре ќе го одбележи 1 Мај - Меѓународниот ден на трудот, со спроведување кампања за мобилизирање ново членство. Централната манифестација ќе се одржи на плоштадот „Македонија“ каде што ќе бидат промовирани активностите и услугите на сите 17 гранкови синдикати.

„Празникот ќе го почнеме работно, со заедничка порака и повик до сите што не се зачленети во Синдикатот сега да го сторат тоа. Целта е заеднички, преку враќање на единството и довербата во Синдикатот, да постигнеме општ заеднички консензус во насока на зачувување на достоинството на трудот во Македонија“, изјави вчера в.д. претседателот на ССМ, Живко Митревски.

Прв пат годинава на овој ден на трудот, што во изминатите дваесетина години се одбележуваше најчесто со мирни протести на улиците во Скопје и со пароли за поголеми работни права, Синдикатот овој пат донесе одлука за поинаков настап. Место протест или штрајк, како што му доликува на еден ваков ден, Синдикатот ќе се обиде празникот да го искористи да подели пристапници за нови членови.

„Не сме оптоварени со тоа колку народ ќе дојде. Работно ќе го одбележиме празникот, прво во ССМ ќе имаме свечена седница на која ќе ги афирмираме платформите за натамошно дејствување. А, потоа на плоштадот ќе се одржи манифестација каде што сите гранкови синдикати ќе делат промотивни материјали и пристапници, под мотото ’Запознај го својот синдикат и зачлени се‘“, изјави Митревски неодамна за „Утрински весник“.

Инаку, Меѓународниот ден на трудот се одбележува во многу земји во светот со масовни и силни демонстрации против владите, а поради кршењето на работничките и човековите права. Годинава особено се очекуваат пожестоки реакции на работниците, како и судири со полицијата поради големата невработеност во светот како последица од глобалната криза. (М.Т.)