Владата ја обвинува кризата за уцената на фирмите

Според Ставрески, Синдикатот задоцнил со мерката за
намалување на работното време

Светската криза ја принудила Владата да донесе закон што ќе ги условува компаниите да прифаќаат работа без рокови за исплата, се оправда вчера министерот за финансии, Зоран Ставрески, одговарајќи на се' погласните реакции на стопанствениците за новото законско решение.

„Тоа значи дека ќе се реализираат проектите и нема да дојде до прекин што ќе доведе до губење на работата на фирмите, како и на работните места на вработените“, изјави Ставрески. Според него, решавањето на ситуациите во однос на плаќањето и во однос на реализацијата на проектите за изградба ќе биде спогодбено. „Секако ќе беше подобро да немаше светска економска криза и економијата да се решаваше на ваков начин“, додаде министерот за финансии.

Министерот повторно не кажа точна бројка за долгот на државата кон фирмите, само ги демантираше оние што досега се изнесени. „Мислам дека максимално правиме она што е можно во вакви околности за да се реализираат обврските на државата кон сите сегменти и верувам дека досега успеавме барем да нема големо доцнење во плаќањата. Еве би сакал официјално, со оглед на тоа дека често се шпекулира за бројките, да ги демантирам сите бројки што беа изнесени на телевизијата А1. Ве молам, не можеме секој ден иста тема, исти прашања, исти одговори“, рече Ставрески.

Владата правела напори да не се доцни многу и со враќањето на ДДВ. „Тоа е причината зошто економската активност паѓа со помала динамика отколку во други земји во кои и владите и приватниот сектор имаат поголеми проблеми“, рече министерот.

За него синдикатот задоцнил со антикризната мерка за намалување на работното време, како еден од начините за подобрување на состојбата на работниците. „Тоа требаше да го направи кога светската рецесија ја зафати и Македонија, а не во услови кога економијата полека закрепнува“, смета Ставрески. Тој најави дека за овие барања Владата дополнително ќе се изјасни. (Ек.Р.)