Изборите на 22 или на 29 март

Велјаноски ќе ги закаже веднаш штом ќе бидат усвоени уставните измени за цензусот за избор на претседател

Оливера Војновска

Претседателските и локалните избори ќе се одржат на 22 или на 29 март идната година, а претседателот на Собранието, Трајко Велјаноски, ќе ги закаже веднаш што ќе бидат усвоени уставните измени за намалување на цензусот во вториот круг од претседателските избори. Седницата за овие шести по ред измени на Уставот е закажана за 9 јануари.

Спикерот Велјаноски на неформална средба со новинарите рече дека планира да ги свика изборите во последната или претпоследната недела од март. Тој најави дека претходно за ова ќе направи консултации со пратеничките групи. Собранието ќе заседава до средината на февруари, а во периодот на изборите нема да има пленарни седници. Велјаноски лично преферира изборите да бидат на 22 март за побрзо да заврши целата изборна приказна и институциите да продолжат да функционираат нормално.

Двата термина се прифатливи и за власта и за опозицијата, тие велат дека нема суштинска разлика дали гласањето ќе биде една недела порано или подоцна. Датумот на изборите начелно беше договорен на лидерските средби, а во новиот Изборен законик е наведено дека тие ќе се одржат на крајот на март.

Дотогаш има повеќе од три месеци, официјалниот старт на кампањата е 20 дена пред денот на одржување на изборите, но партиите одамна ја пуштија пропагандната машинерија. Во тоа е неприкосновена владејачката ВМРО-ДПМНЕ.

Портпаролката на ДУИ, пратеничката Ермира Мехмети, вели дека клучното прашање не е кога ќе бидат изборите, туку какви ќе бидат. „Немаме забелешка во однос на точниот датум на гласањето. Најважно е во целиот период пред започнувањето на кампањата да бидат завршени сите подготовки за да имаме беспрекорен и целосно демократски изборен процес“, изјави Мехмети. Таа вели дека уставно и законско право е претседателот на Собранието да го определи терминот и да ги распише изборите.

„За време на преговорите за Изборниот законик, 29 март беше споменуван како можен датум на изборите најмногу поради подготовките на изборите, роковите што треба да ги испочитува ДИК. Но, доколку тој смета дека треба да се оди на избори на 22 март, ние сме подготвени“, ни рече шефицата на пратеничката група на СДСМ, Цветанка Иванова.

Според Иванова, социјалдемократите се подготвуваат за избори како и сите останати партии, но тие не ја почнале кампањата. Таа тврди дека владејачката ВМРО-ДПМНЕ е целосно влезена во изборниот филм. „Власта комплетно со целата машинерија е во кампања, буквално целиот политички естаблишмент е на терен“, вели Иванова. Пратеничката од ЛДП, Роза Топузова-Каревска, вели дека либералдемократите се подготвуваат за избори, иако за разлика од поголемите партии се' уште не ја почнале кампањата.