Лековите за плодност не го зголемуваат ризикот од рак на јајчници

Најновата студија на дански истражувачи ги смирува жените

Жените што користат лекови за плодност немаат зголемен ризик за појава на рак на јајчници, покажува големата студија на дански истражувачи. Во тек се дебати дали лековите за плодност ја зголемуваат веројатноста за рак на јајчниците. Претходните студии дадоа контрадикторни податоци, а загриженоста и натаму е присутна, особено кај жените што минуваат низ неколку циклуси на лекување за плодност или оние што никогаш не останале бремени.

Во најновата студија истражувачите од Данското здружение за борба против ракот ги анализираа податоците од 54.362 жени што се упатиле на клиниката за плодност во периодот меѓу 1963 и 1998 година. Од нив, кај 156 се развил рак на јајчници. Истражувачите ги приспособуваат податоците според неколку ризик-фактори, а потоа го проценуваат ефектот на четири групи лекови за плодност во просечен период од 16 години.

Студијата не покажа севкупен зголемен ризик за рак на јајчници по употребата на некој лек за плодност. Покрај тоа, не е утврден зголемен ризик кај жените што имале 10 или повеќе циклуси на лекување за плодност или кај жените што никогаш не останале бремени.

Многу од жените опфатени во студијата не ја достигнале максималната возраст за рак на јајчниците, па затоа истражувачите планираат да продолжат да го следат ризикот кај нив. Пенелоп Веб, истражувач од Институтот за медицински истражувања Квинсленд од Австралија, истакна дека податоците се уверувачки и нудат уште еден доказ дека употребата на лекови за плодност не го зголемува ризикот од рак на јајчници.

(Хелтдејл њуз)