Расте поддршката на битолчани за млекарот Илиевски

Редица кај тезгата на мајката на притворениот млекар. Муштерии доаѓаат дури од Прилеп за да и дадат поддршка

Битола - Ред се редат битолските пазарџии да купат компири, боранија, тиквички, млеко и што уште не од тезгата на млекарот Душко Илиевски на битолскиот пазар и да помогнат барем финансиски семејството да не остане без леб кога веќе остана без мажите.

Мајката на млекарот, Лиле Илиевска, од рано наутро ги наполнила гајбите со зеленчук и уште пред да се раздени, се подготвила за продажба за да им однесе леб на своите четири дробни внучиња и на двете снаи, кои останаа сами без татко и без мажи откако полицијата ги притвори нејзините двајца синови Душко и Цане и сопругот Томе, осомничени за одгледување марихуана.

Поддршката за семејството Илиевски доаѓа од сите страни и секој ден е се' поголема. Вчера пазарот во Битола беше преплавен од граѓани што на себе носеа бели маици со ликот на Душко, на кои стоеше паролата „Слобода за Дуле“. Завчера над две и пол илјади битолчани за само неколку часа го ставија својот потпис на петицијата поднесена од опозициската СДСМ за ослободување на фармерот и неговиот брат и татко. Собирањето потписи продолжува и во наредните денови.

Судот во Битола, пак, одлучи негативно по жалбата на одбраната на Илиевски, осомничените да се бранат од слобода. Тројцата говедари остануваат во притвор се' до одлуката на обвинителството во Битола, кое за многу скоро треба да одлучи дали против нив ќе поведе обвинителен акт или, пак, ќе бидат ослободени.

Слободата на фармерите ја посакуваат многумина од граѓаните на Битола.

Пазарџии вчера, кога во Битола беше пазарен ден, со сочувство за голготата низ која минува семејството Илиевски, но и со револт поради, како што велат, неправдата најголемиот дел од нив иако пазарот тежеше со земјоделски производи купуваа токму од тезгата на Илиевски. Велат, ако не можат да им помогнат на уапсените фармери по судовите и по затворите барем да им помогнат финансиски со тоа што купат од нивите земјоделски производи.

„Ако треба и ред ќе чекам и ќе купам компири од оваа мачна жена. Остана без децата и мажот за инает на политиката. Овие луѓе се чесни и ги знам од време, од кај нив сум пазарела отсекогаш, со труд и со мака ги заработуваат парите, а не со лезет од дрога. Душата ми плаче, сочувствувам со нив како да ми се фамилија. Ова е и срамота и гревота за овие луѓе“, вели насолзена во очите битолчанката Васа Настева.

Веста за случајот со фармерот Душко Илиевски не ги остави рамнодушни ниту прилепчани, кои вчера дојдоа на пазарење во Битола.

��Зошто го затворија детето, се чудиме. Верувајте, па не мора да си битолчанец за да видиш дека дивиот коноп го има насекаде. Јас бев седнат во една кафеана кај железничката станица и на само две метра од неа има такво растение. А да видите само во Прилеп. Јас сум од Варош, го има насекаде каде што има влага. Па никого не уапсиле. Ова е само инает на некој од власта, ништо повеќе“, вели пазарџијата Трајче Забрчанец од Прилеп .

Откако мажите од семејството Илиевски завршија во притвор, роднините и пријателите ставија по една рака за да и' помогнат на мајката Лиле да ја собере летнината од нивите да не скапува по амбарите и да ја однесе на пазар. Маката го обедини семејството како никогаш досега.

„Ова што им се случува на луѓето е катастрофа. Ако почне полицијата да апси за се' и сешто, за што било и за што не било, каде ќе ни биде крајот. Овие мачни жени сега треба и трактори за возат и да копаат и да продаваат. Цело семејство се нафативме да им помогнеме“, вели роднината Љубе Димовски.

Мајката на млекарот Душко, 57-годишната Лиле Илиевска, со солзи во очите, но и гнев во душата, постојано лелека што неправдата удрила силно врз грбот на нејзиното семејство. Брза во движењата и вешта во работата Илиевска продаваше од зеленчукот колнејќи ја својата судбина.

„Јас ако работев марихуана, не ќе бев ваква мајка. Што леб јадеме, сакате да видите - еве тоа се моите вени на ногата. Тоа е од вреќи со компири носење на грб, од копање на нивите, од работа, а не од дрога“, извика мајката Лиле, покажувајќи на испуштени вени, кои буквално ги деформирале нејзините нозе.

Илиевска обвинува дека власта од чесни земјоделци од нив направила социјални случаи. „Четирите внучиња ми се оставени дома на милост и немилост. Сама сум во 25 погони земја, цел пазар со двете раце може да ми потпише дека сме чесни. Јас возам трактор, јас орам, јас копам. Ги изгубивме парите за млекото, ги изгубивме кравите, а сега и луѓето. Ако синовите и мажот останат во притвор уште еден ден, ќе ги земам снаите и децата за рака и ќе им ги однесам во социјалното, државата нека ги храни“, се жали мајката на млекарот Душко.

Тричлениот кривичен судски совет вчера одлучи тројцата фармери да останат во притвор. Во меѓувреме, судот по завршувањето на истрагата предметот за осомничените мажи од семејството Илиевски го испрати до Основното јавно обвинителство во Битола, по што ќе се знае дали за млекарите ќе биде поднесено обвинение за делото за кое се товарат или, пак, ќе бидат ослободени од гонење.

„Истрагата на судијата заврши денеска. Нашите барања за ослободување од притвор се одбиени, сега ја чекаме одлуката од обвинителството. Имаме информација и од вештачењето на МВР врз растението што е најдено во нивата на нашите клиенти. Според нив, во врвовите на листовите на тоа растение се најдени некакви супстанци, кои нешто дефинираат. Но, ние ќе бараме независна експертиза, а не онаа на МВР“, рече адвокатот на притворените Васко Талевски.

Според портпаролот на судот во Битола, судијата Милка Бизевска, во судската практика мал е бројот на случаи кога осомничени за дрога се бранат од слобода, бидејќи истрагата смета дека тоа може да влијае на истражната постапка и прибирањето докази.

„Тие се специфични и тешки дела. И за испитување и за докажување има можност да се влијае на многу работи. И обично за сите потешки дека се одредува притвор“, напоменува судијата Бизевска.

Млекарот Душко Илиевски, еден од водачите на пелагониските фармери ограбени од „Свдемилк“, неговиот брат Цане и татко му Томе од петокот се во притвор, а се осомничени за недозволена трговија со дрога и психотрипни супстанци. Полицијата во нивната нива со компири во индустрискиот дел на градот пронајде 203 стебла од растението канабис сатива. (А.Б.)