„Духот на баба Илонка“ премиерно на фестивал во Пула
Играниот филм за деца и возрасни „Духот на Баба Илонка“, во хрватско-австриско-македонска копродукција, а во режија на Томислав Жаја и по сценарио на Ирена Крчелиќ, своето премиерно прикажување ќе го оствари на 58. издание на Фестивалот на игран филм во Пула, кој почнува денеска, а ќе трае до 23 јули.
„Духот на Баба Илонка“ е избран да се прикаже во главната секција на националната програма на 19 јули. Филмот се снимаше во јануари и февруари оваа година на локации во Загреб, Скопје и во Виена. Станува збор за музичка комедија со елементи на фантастика која го портретира животот на едно необично семејство низ очите на десетгодишно девојче.
Главните улоги ги толкуваат младите Селма Ибрахими и Марин Арман Грбин, а македонската глумачка фела, предводена од Сабина Ајрула (во улогата на баба Илонка), ја претставуваат уште и Емран Куртисова, Северџан Бајрам, Ирфан Незир и Дилавер Муаремов.
Директор на фотографија е Марио Делиќ, а композитор е Вјеран Шаламон. |
