Шест милиона евра за седум мали ХЕЦ

Европската банка за обнова и развој ќе даде заем од шест милиони евра за седум мали хидроелектрани, лоцирани на седум различни реки низ земјава. Централите ќе имаат вкупен производствен капацитет од 5,83 мегавати и во просек ќе произведуваат околу 21.630 мегават-часови струја годишно. Капацитетите ќе бидат поврзани со дистрибутивната мрежа, при што ќе има договори за повластен откуп со МЕПСО.

Ова е прва инвестиција на ЕБОР во приватни капацитети за производство на струја во земјава, а ќе се финансира преку линијата за директно финансирање проекти за одржлива енергија за земјите од Западен Балкан. По завршувањето, проектот ќе доведе до намалување на емисијата на јаглерод диоксид од околу 14.000 тони годишно. (МИА)