Насловна

Албанците изборни кралеви

Македонија избра континуитет, десницата прогласи изборна победа, владејачката коалиција доби уште една шанса, мирни избори по жестоката предизборна кавга и Албанците кралеви - се најударните наслови во странските медиуми вчера за изборите во земјата. Сите се согласуваат дека гласањето било мирно и без проблеми, а бугарскиот шеф на дипломатијата отиде чекор напред, па ги прогласи изборите за демократски и фер пред меѓународните набљудувачи.

Сега ВМРО-ДПМНЕ треба да си најде коалиционен партнер, а ДУИ е посилен од кога и да е, е коментарот на агенцијата Ројтерс. Партијата што освојува најмногу места во албанскиот блок вообичаено станува како „крал-играч“ и главен партнер во владината коалиција, оценува агенцијата. Според оцената, гласањето било во сенка на обвинувањата за вознемирувања и за планови за протести во текот на кампањата. Ројтерс го оквалификува премиерот Никола Груевски како популист и заклучува дека изборите се важен тест за патот на земјата за влез во ЕУ и во НАТО. „Македонија беше предупредена дека изборните нерегуларности ќе им наштетат на нејзините напори за евроинтеграција“, се наведува во оцените со додавка дека земјата нема најдобар историјат во одржувањето избори. „Премногу нешта се на тест. Ако се случеше било што од предвидувањата, Македонија ќе ја ризикуваше својата иднина. ЕУ ќе беше подалеку од кога и да е“, цитира за АФП еден западен дипломат. Агенцијата, исто така, се навраќа на спорот за името како главен за овој процес заклучувајќи дека двете партии го заобиколиле спорот во кампањата ветувајќи само дека каква било промена ќе оди на референдум. За АФП изненадување е дека опозицијата го дуплирала, па и надминала бројот на местата во парламентот, иако власта ветувала натамошни економски и политички реформи што ќе го забрзаат влезот на земјата во ЕУ и во НАТО. „Македонија ги избра реформите. Ние сите сонуваме Македонија да стане членка на ЕУ и на НАТО. Татковината е во сигурни раце...“, се најцитираните реченици од говорот на Груевски по победата. Се цитира и изјавата на Влатко Ѓорчев дека овие избори биле класична битка меѓу две различни опции - транзициска и реформска и дека СДСМ сега добила шанса сама да се реформира. Во сите извештаи неизбежно се наведува дека Македонија е една од најсиромашните европски земји и е загрозена од високата невработеност и просечната плата од околу 300 евра.