Во Трново се одржа 28. традиционална иселеничка средба
Битола - Во организација на Заедницата на организациите на етничките Македонци протерани од Грција, вчера во Трново се одржа 28. традиционална иселеничка средба. Претседателот на организација, Никола Костурски, обраќајќи се пред присутните рече дека Македонците биле и ќе останат Македонци. „ Ние не сме варвари, туку отсекогаш сме биле Македонци и Македонци ќе останеме“, нагласи Костурски.
Во име на претседателот на Владата, Никола Груевски, собирот го поздрави министерот за надворешни работи, Антонио Милошоски. „Дозволете ми да ви оддадам почит за вашата истрајност, за вашата упорност, достојност и желба да се изборите за она што на сите нам ни припаѓа како на луѓе“, истакна Милошоски. За сите ваши напори, додаде тој, ја имате и ќе ја имате и во иднина моралната и секоја друга поддршка од Владата на Република Македонија и нашите институции, затоа што почитувањето на човековите права, залагањето за нив и помагањето да се остварат, за нас не се предмет на калкулација, туку принцип кој ќе биде дел од нашата сегашна и идна политика.
Заедницата на организациите на етничките Македонци протерани од Грција синоќа планираше да организира блокада на македонско-грчката граница, поради начинот на кој Грција ги третира Македонците од Егејскиот дел на Македонија. (П.Р.)
|
