По земјотресот, Сечуан стравува од излевање на вештачките езера
Постои опасност 69 брани да попуштат, иако се преземаат чекори за намалување на тој ризик
Кинеските војници ги почнаа работите околу одблокирање на езерото формирано од лизгањето на земјиштето за време на катастрофалниот земјотрес во провинцијата Сечуан. Околу 1.800 војници донесоа експлозив до езерото Тангџијашан, каде што ќе се обидат со експлозија да ги отстранат урнатините, соопштија државните медиуми. Нивото на водата во езерото, кое е на три километри од градот Беичуан, брзо се зголемува и експертите стравуваат дека би можело да ја урне препреката.
Во регионот и понатаму се чувствуваат загрижувачки тензии. Во неделата шест лица загинаа, а илјада беа повредени кога се случи силен удар. Четири лица загинаа во Ханжонг во провинцијата Шанкси, објави новинската агенција Ксинхуа. Едно лице го загуби животот во провинцијата Сечуан, а друго во Гансу. Повеќе од 270.000 дома се уништени или сериозно оштетени, додава агенцијата. Десетици езера беа формирани кога лизгањето на земјиштето предизвикано од силниот земјотрес што се случи на 12 мај ги блокираше реките.
Во неделата вицепремиерот за водни ресурси, И Џингпинг, изјави дека езерата се „под контрола“, но ситуацијата ја опиша како сериозна. Прогнозите за обилни дождови во следните неколку дена би можеле да предизвикаат препреките што ги блокираат езерата да попуштат и да ги поплават околните места. Илјадници лица по должината на езерото беа евакуирани.
Се' уште постојат континуирани загрижености околу состојбата на браните во регионот. Џингпинг изјави дека постои опасност 69 брани да попуштат, иако се преземаат чекори за намалување на тој ризик. Повеќе од 300 беа погодени од земјотресот, додаде тој, наведувајќи дека на повеќето од нив водата е испуштена, а во останатите нивото е намалено. (Би-Би-Си) |
