Претходен број

Јушченко бара заминување на руската флота од Крим

Од нашиот дописник
Бранко Влаховиќ

МОСКВА - Раководството на Русија и на Украина во последните десетина дена ги доведоа политичките односи на најниско ниво од распаѓањето на СССР досега. Последните четири дена се појавија такви пукнатини во политичко-дипломатските односи кои не можат веќе лесно „да се залепат“. Во петокот агенциите речиси цел ден ја објавуваа веста дека Путин нема да ја прими Јулија Тимошенко во Минск, по состанокот на премиерите на поранешните советски републики. На крајот, сепак, упорната „убава Јулија“ успеа макар и на кратко да разговара со Путин.

Епилогот на политичките судири меѓу Киев и Москва беше во саботата кога Министерството за надворешни работи на Украина соопшти дека руската Црноморска флота ќе мора да ја напушти воено-морската база на Крим на 28 мај 2017 година, кога ќе истече сегашниот меѓудржавен договор. Украинските дипломати добија задача од претседателот Јушченко јавно да кажат дека домаќините нема да разгледуваат можност за одложување на престојот на руската Црноморска флота по 2017 година. Во соопштението се вели дека заминувањето на руската флота ќе ја зајакне стабилноста во регионот. Пред тоа претседателот Јушченко на 20 мај побара да се подготви проект-закон со кој во 2017 година би се вршело селењето на руската флота од Крим. Таа вест беше збунувачка, бидејќи на 11 мај во Севастопољ руски и украински морнари заедно ја прославија 225-годишнината на Црноморската флота.