На крајот од осумдесетите години на минатиот век, за време на ирачко-иранската војна, авионите биле испрати во Србија на сервисирање
БАГДАД - Ирак преговара за враќање на 19 борбени авиони што режимот на Садам Хусеин на крајот од осумдесетите години на минатиот век, за време на ирачко-иранската војна, ги испрати во Србија на сервисирање, соопшти ирачкото министерство за одбрана. Делегацијата замина за Србија за да го почне процесот и „да ги врати потрошените пари од страна на поранешниот ирачки режим“, се наведува во соопштението од страна на министерството. Санкциите спроведени врз Ирак поради инвазијата на Садам врз Кувајт во 1990 година направија да биде невозможно да се вратат борбените авиони „МИГ-21“ и „МИГ-23“ додека тој беше на власт. „Ние разговаравме за оваа работа со српската страна за можноста за поправање на овие авиони и нивно враќање во служба“, соопштија од министерството. „Сите знаат за нашата потреба за борбени авиони“.
Два авиона се подготвени за „моментна употреба“, се наведува во соопштението, а постигнат е и прелиминарен договор со српските власти за поправка на останатите авиони и нивно враќање. Во соопштението не се наведува кога се дознало за постоењето на овие борбени авиони.
Ирак сака истовремено да ги обнови силните воено-воздухопловни сили, додека се обидува да ја реорганизира армијата уништена од инвазијата предводена од САД во 2003 година и одлуката на американските администратори во Ирак за распуштање на ирачките сили како последица на тоа. (Ројтерс)
