Медведев ги нарече „цинична лага“ изјавите во кои се става знак на еднаквост меѓу фашистичка Германија и Советскиот Сојуз

Од нашиот дописник
Бранко Влаховиќ



МОСКВА - Во пресрет на 70-годишнината од почетокот на Втората светска војна, што ќе биде одбележана во Полска на 1 септември, рускиот претседател Дмитриј Медведев ги нарече „цинична лага“ изјавите во кои се става знак на еднаквост што се однесува до одговорноста меѓу фашистичка Германија и Советскиот Сојуз. Зборувајќи во ТВ-емисијата „Вести на неделата“, Дмитриј Медведев изјави дека Втората светска војна беше голема трагедија на 20 век, која според различни податоци однесе околу 70 милиони животи, а таа бројка се' уште не е утврдена.

Последниве неколку дена руски и полски историчари водеа полемика околу тоа дали Сталин е виновен за судбината на Полска, затоа што Хитлер многу брзо по потпишувањето на пактот меѓу Молотов и Рибентроп за ненапаѓање, како и тајниот протокол, тргна кон исток. Руските историчари потсетуваат дека Полска многу порано потпиша пакт за ненапаѓање со Хитлер. Повеќето руски историчари сметаат дека Сталин настојувал да добие во време, бидејќи бил свесен за неминовноста на војната со Хитлер. Освен тоа, историчарите во Москва мислат дека западните земји сакале да избегнат судир со Хитлер, за да искрвави СССР.

„За жал, денес сме сведоци на јавно назадување (регрес) што се однесува до оцената за Втората светска војна. Уште пред 20-30 години, дури во време на разликите во идеолошките пристапи, постоењето на спротивставени блокови, притоа мислам на западниот свет и истокот, Варшавскиот договор и НАТО, сите беа единствени дека фашизмот доби праведна оцена, а фашистичките злосторници беа заслужено осудени во Нирнберг“, изјави Медведев. Тој додаде дека сега кога се тврди дека постојат општи вредности, сепак, се случуваат поразителни работи. Претседателот Медведев не навлегуваше во изнесувањето на својот став во таа полемика. „Државите од Балтикот, па дури и Украина, ги прогласуваат за национални херои луѓето што им беа соработници на нацистите. Иако сите премногу добро разбираат дека било срамно да се спушта погледот за да не се расипуваат односите“, истакна Медведев.

„Тоа изедначување на вината е цинична лага. Може различно да се однесувате кон СССР, може многу критично да се однесувате кон режимот кој постоеше во Советскиот Сојуз и кон неговите лидери во тој период... Прашањето е кој ја почна војната, кој убиваше луѓе, а кој спасуваше милиони животи и на крај ја с��аси Европа“, изјави Медведев. Тој нагласи дека е убеден во тоа дека не смее да се прекројува историјата за да им се угоди на неколку земји.

На годишнината од Втората светска војна во Гдањск, каде што ќе присуствуваат државници од повеќе од 30 земји, Русија ќе биде претставена од премиерот Владимир Путин. Тој по тој повод напиша и авторски текст за полскиот весник „Газета виборча“. Во Гдањск ќе биде и германската канцеларка Ангела Меркел, која изјави дека тој ден „е сигнал на помирување“ и потсети „за вината на Германија пред себе си“. Голем број Полјаци се незадоволни од тоа што од САД пристигнува делегација со поранешни раководители т.е. поранешен министер за одбрана.

Особено внимание кај полската јавност предизвика доаѓањето на Владимир Путин. Според најновото социолошко истражување, што го спроведе центарот „Полонија“, 76 отсто од анкетираните Полјаци сметаат дека рускиот премиер Путин би требало да и' се извини на Полска што советската армија на 17 септември 1939 година влезе во тогашната полска територија.