Претходен број

Книшките готови, возачите добиваат негативни поени за сообраќајни грешки

Кога возачот ќе добие 100 негативни поени, му се ништи возачката дозвола

Горан Адамовски

Возачките книшки се готови. Возачите што ќе се огрешат пред законот со поситни прекршоци, како што се неврзан појас, зборување на мобилен телефон, преминување цик-цак, возење без светла и слично, а кои нема да сакаат да платат казна, ќе бидат евидентирани во книшките, што важат од средата. Тие ќе се издаваат по лично барање на граѓаните и ќе чинат 100 денари. Возачите што немаат направено прекршок, не мора да вадат книшки. Негативните поени се опција само при поситните прекршоци, додека при потешките, како што се возење под дејство на алкохол, минување семафор на црвено светло или возење без возачка дозвола, не постои ваква алтернативна можност. Возачката книшка трае три години, но доколку возачот стигне до 100 поени, му се ништи возачката дозвола и ќе мора да полага одново. Возачите што направиле прекршок во изминатата година, откога почна да важи новиот Закон за сообраќај, а не го платиле, треба да дојдат во најблиската полициска станица да им бидат впишани поените што им се евидентирани во компјутер.

„Издавањето на возачките книшки се врши во сите СВР, во одделенијата за управни работи и во ПС од општа надлежност – Надворешни канцеларии за управни работи (поранешни СВР и ОВР) при издавање на новите возачки дозволи“, велат од МВР. Книшките автоматски ќе им се издаваат на граѓаните што ќе го положат возачкиот испит.

Кон пријавата за издавање возачка книшка се поднесува возачка дозвола, две фотографии со димензии 3,5 х 4,5 см и лична карта. Впишувањето негативни бодови ќе се врши според местото на живеалиштето на сторителот на прекршокот.

Од МВР информираат дека во првите два дена во Скопје биле издадени 61 возачка книшка, во Куманово - 70, во Тетово - 22, а во Штип - 4.

Едноставно кажано, кога полицаецот ќе ве казни за поситен прекршок, на пример за погрешно паркирање на автомобилот, имате избор да платите 45 евра за казната, односно 25 евра ако платите во рок од осум дена или да добиете 25 негативни поени. Ако се одлучите за поените, тогаш во рок од 30 дена треба да ја однесете книшката во станица заради регистрирање на негативни бодови. Ако не го направите тоа, полицаецот што ви ја пишал казната ќе поднесе барање за поведување прекршочна постапка пред Комисијата за одлучување по прекршоците на МВР.

За потешките прекршоци, како што се возење под дејство на алкохол, минување семафор на црвено, погрешно паркирање во близина на пешачки премин или непропуштање пешаци на обележан премин, не важи можноста за негативни поени. Тука важат енормно големи казни, кои се дуплираат ако не се плати во рок од осум дена.

ПОЛЕСНИ ПРЕКРШОЦИ

- Користење мобилен телефон за време на возење: 45 евра или 25 негативни поени

- Неврзување сигурносни појаси: 20 евра или 10 негативни поени

- Непрописно запирање или паркирање: 45 евра или 25 негативни поени

- Возење без запалени светла: 35 евра или 20 негативни поени

- Непоседување или непокажување возачка дозвола: 20 евра или 10 негативни поени

- Непрописно движење по обележана сообраќајна лента: 20 евра или 10 негативни бода

- Пречекорување дозволена брзина на движење од 10 до 30 км на час во населено место: 45 евра или 25 негативни поени

- Непријавување на промена на живеалиште од возач: 45 евра или 25 негативни бода

ТЕШКИ ПРЕКРШОЦИ

- Возење под дејство на алкохол: 400 евра

- Минување семафор на црвено светло: 300 евра

- Возење без возачка дозвола: 300 евра

- Непропуштање на пешак: 300 евра

- Погрешно паркирање во близина на пешачки премин: 250 евра