Претходен број

Средношколците на улица поради новите тестирања

Средношколците не сакаат тестови со кои ќе се проверува нивното знаење на крај од учебната година

Жаклина Хаџи-Зафирова

Околу двесте средношколци од неколку средни скопски училишта вчера протестираа пред Министерството за образование и наука поради воведувањето нови, стандардизирани тестови за проверка на знаењата во средните училишта од оваа учебна година. Средношколците, кои претходно се вознемирија од државната матура, сега се избезумени поради новите тестови, за кои велат дека не знаат ни зошто се воведуваат, а и професорите не се запознати што ќе содржат. Единствено што знаат е само дека ќе бидат оценувани по одреден предмет на крајот на секоја учебна година, што за нив е дополнителен стрес, бидејќи ќе бидат оценувани и во текот на целата учебна година. Од Министерството уверуваат дека ваквото оценување ќе биде добар показател за тоа дали било реално оценувањето на наставникот.

Средношколците негодуваат, бидејќи државната матура и полагањето на новите тестови се преголем товар за нив. Тие вчера протестираа пред Министерството и во текот на попладневните часови. „Доволно не' тестираат во текот на учебната година. Нашите професори се одлични и знаат да не' оценат. Ние им веруваме и не треба никој друг да не' оценува“, вели една средношколка. Според неа, врски при оценувањето има и тие нема да се укинат со овие тестови. „Ако некој сака, пак ќе потплати и ќе го помине тестот. Тоа не е некаква сигурност. Не се плашиме од овие тестови, туку тие треба да бидат распоредени во текот на годината“, децидна е средношколката. И повеќето други средношколци сметаат дека новите тестови не се потребни бидејќи, според нив, со државната матура ќе се види знаењето на учениците.

Раководителот за основно и за средно образование, Љупчо Спасовски, вчера се сретна со претставници на средношколците на кои им ги појаснил измените во законот со кои се воведени новите тестови. Тој добил впечаток дека тие не се запознаени со новиот начин на оценување.

„Не станува збор за оценување по дванаесет предмети, туку за проверка на квалитетот на воспитно-образовниот процес. Се врши проверка на знаењето по еден наставен предмет од одреден наставник. Сите ученици ќе полагаат по еден предмет кој ќе се бира компјутерски. Ќе има екстерна проверка за знаењето во една паралелка за секој наставник“, изјави Спасовски, кој појасни дека проверката е со цел да се провери квалитетот на оценувањето на наставниците.

Со новите законски измени, тестови, покрај средношколците, ќе полагаат и основците од четврто до осмо одделение. Оценките што ќе се добијат од полагањето на предметот ќе влијаат врз формирањето на конечната оценка. Наставниците ќе бидат наградувани, односно казнувани во зависност од оценката што ќе ја добие ученикот. Оние наставници кај чии предмети ќе има најмали отстапувања од оценката ќе добијат за 15 отсто повисока плата. Оние кај кои ќе бидат забележани најголеми отстапувања ќе бидат казнети со 10 отсто помала плата.