Потписите мора да се собираат во Министерството за правда, независно што е тоа иницијатива на локално ниво

Деспина Трајковска

„Законот за референдум не е кохерентен, има непрецизен јазик, а дополнителна конфузија му внесува автентичното толкување од 2006 година што го донесе Законодавно-правната комисија, кое, сепак, има сила на закон“. Вака Рената Десковска, професорка на Правниот факултет, го толкува Законот за референдум на кој се повика мнозинството на Советот на Општина Центар и како незаконска ја одби граѓанската иницијатива за распишување референдум на кој граѓаните на Центар би се изјасниле дали се за изградба на какви било верски објекти на плоштадот „Македонија“.

„Лично сметам дека Законот има нелогичности, пред се', во однос на начинот на собирање потпис, кои како што е наложено треба да се собираат во Министерството за правда, без оглед дали станува збор за граѓанска иницијатива на државно или на локално ниво. Така и во случајов, невладините организации требало да ги соберат потписите пред надлежниот орган. Сепак, сметам дека тоа е нелогично, но автентичното толкување така налага и треба да се испочитува, бидејќи има сила на закон“, вели Десковска.

Според неа, невладините организации имаат право на повторување на постапката. За да ја постигнат целта - распишување референдум, тие имаат две опции согласно со законот. Да соберат потписи од 10 отсто од граѓаните запишани во избирачкиот список на Општина Центар и иницијативата за референдумот да ја достават пред Советот, тој да донесе одлука. Другата варијанта, посочува Десковска, е собирање 20 отсто потписи од вкупниот број граѓани на Центар и во тој случај Општината ќе биде обврзана да распише референдум.

Иницијаторите на референдумот се' уште не утврдиле кога и какви конкретни чекори ќе преземат. Разочарани, како што велат, од недемократскиот однос на мнозинството советници на Центар, од „Плоштад слобода“ вчера се' уште ги средуваа впечатоците по завчерашното одбивање на нивната иницијатива. Што понатаму, засега не одлучиле.

„Најдоцна до среда ќе утврдиме какви активности ќе преземеме понатаму, но, дефинитивно, јасно е дека не се откажуваме од иницијативата. Дали ќе собираме потписи за иницијативата да ја разгледува повторно Советот или, пак, 20 отсто потписи за распишување референдум од страна на Општината, ќе одлучиме деновиве“, изјави вчера Никола Наумовски, претставник од „Плоштад слобода“.

Тој вели дека не е исклучена можноста иницијаторите на референдумот да поднесат тужби за нарушување на демократското право на граѓаните против советниците што ја отфрлија иницијативата. Одлуката за отфрлање на иницијативата ја донесоа советниците на ВМРО-ДПМНЕ, а членовите на СДСМ беа воздржани, по тричасовно надмудрување и на моменти тензична атмосфера. И вчера, како и по жешката седница, градон��чалникот Владимир Тодоровиќ не сакаше да ги коментира случувањата, со образложение дека целата надлежност и одговорност во случајов е на Советот и на неговите членови.

Инаку, вчера повторно се огласија иницијаторите за изградба на Бурмали-џамијата. На НВО „Деница“, која бара на истата локација да се изгради црква „Свети Никола“, и' дадоа рок од седум дена да им се извини на муслиманите.

„Тие изнесоа еден куп лаги и навреди на сметка на муслиманите, првенствено дека на истата локација на Бурмали-џамија претходно постоела црква, што апсолутно не е вистина“, дополни Рамадан Рамадани од Иницијативниот одбор за изградба на Бурмали-џамијата.