СДСМ го прозва МВР за панцирите

СДСМ обвини за скандалозни јавни набавки во Министерството за внатрешни работи поврзани со фирмата „Линк медија плус“, која, како што тврди опозиционата партија, била ангажирана за разновидни набавки во повеќе државни институции. Како што рече на прес-конференцијата партискиот портпарол, Емилијан Станковиќ, во март годинава фирмата склучила договор со МВР за 500 панцири, по цена од 1.400 евра за еден или околу 700.000 евра вкупно. При тоа, тој посочи дека има многу поевтини панцири, а управителот на „Линк медија плус“ во 2008 година имал кривична пријава од финансиската полиција за затајување данок.

„Набавката на 500 панцири МВР ја спровела во согласно со член 7 од Законот за јавни набавки и ја третира како класифицирана информација, но во исто време, во согласност со став 2 од истиот член, МВР е обврзано задолжително да ја извести Владата за набавката. Со други зборови, македонскиот премиер Никола Груевски мора да знаел за оваа набавка“, рече Станковиќ. Тој праша дали е точно дека од одлуката за набавка до изборот на најповолен понудувач поминале само седум, односно пет работни дена, и дали седиштето на фирмата „Линк медија плус“ е на иста адреса како и станот на еден од браќата Мијалкови и, ако е така, дали е тоа случајно совпаѓање.