Ректорот Мартиновски нема докази дека студентските избори се фалсификувани

Ректорот не верува дека кој било студент би бил подготвен да фалсификува избори

БИЛЈАНА ЈОВАНОВСКА

Изборите за претседател на Сојузот на студентите на Универзитетот „Св. Кирил и Методиј“ немаа регуларна завршница, беа проследени со фалсификати, целата постапка е оспорена и пред судските органи, а ректорот Ѓорѓи Мартиновски му даде зелено светло на кандидатот Самоил Малчевски за влез во просториите на организацијата. Истовремено, им даде легитимитет и нему и на одлуката на нелегитимното Собрание, како и на сите придружни случувања непримерни за избор на претседател на студентите на најстариот државен универзитет. Иако ова беа едни од највалканите студентски избори, во кои за остварување на целта буквално не се бираа средства и методи. И самиот Малчевски не криеше дека зад него стои владејачката ВМРО-ДПМНЕ.

Парадоксот да е поголем, ректорот Мартиновски претходно бил информиран од експретседателот на ССУКМ, Александар Давчевски, дека Малчевски со фалсификуван печат доставил документи во Централниот регистар за да му издаде решение за нов застапник на ССУКМ.

„Непријатно сум изненаден од потегот на проф. Мартиновски“, вели Давчевски, „зашто сметав дека ректорскиот збор тежи. Три-четири дена пред да потпише договор со Малчевски за користење на просториите на ССУКМ, ме убедуваше дека како студенти не смееме да бидеме подложни на никакви притисоци и влијанија, дека изборите мора да добијат регуларна завршница. Беше толку лут на службите во Ректоратот кои му испратиле на Малчевски покана за присуство на седница на Ректорската управа што дури го викна и генералниот секретар и, тропнувајќи со раката на маса, од него побара да ги казни тие што ја испратиле поканата“, ни раскажува Давчевски.

Во изјавата за „Утрински весник“, првиот човек на Скопскиот универзитет тврди дека ништо не му потпишал на Малчевски, туку со него само го продолжил договорот за користење на просториите на ССУКМ. „Не навлегувам кој е легитимен претседател и кој има регуларни документи и печат“, објаснува Мартиновски. „Лично не сум видел документи кои би ме увериле дека изборите за претседател на ССУКМ биле нерегуларни, такви докази се' уште немаме во Ректоратот, а судот не донел привремена мерка. Поради тоа треба да се биде претпазлив во тврдењата дека изборите биле фалсификувани и нерегуларни, зашто не верувам дека на такво нешто би бил подготвен ниту еден студент на нашиот Универзитет, а најмалку кандидат за претседател на ССУКМ“, тврди ректорот на Скопскиот универзитет.