Владата ќе бара одговорност за Тапанџиоски за бришењето на невработените

Денеска Тапанџиоски треба да достави до МВР детален извештај за бришењата што ги правел

Од Владата најавуваат дека врз основа на извештајот на директорот на Агенцијата за вработување, Стојче Тапанџиоски, што треба да го достави во МВР денеска, министрите на наредната седница ќе одлучуваат дали да поведат одговорност за функција - директор и ќе побараат негова смена од раководното место.

Тапанџиоски, како што бараше самиот, треба да достави извештај во МВР за случајот со бришењата на невработените лица за време на претходната влада, во што, како што изјави самиот на последната прес-конференција, и тој учествувал под притисок на претходниот министер за труд и социјала, Стевчо Јакимовски. Веднаш потоа Тапанџиоски беше повикан на информативен разговор во МВР и во тек е полициска истрага. Тапанџиоски бараше дополнителни неколку дена за да обезбеди документи кои ќе ја потврдат точноста на неговата изјава. Освен тоа, МВР бара од Тапанџиоски да поднесе детален извештај за процесот на бришењето на невработените, но и да ги посочи сите инволвирани лица.

Од опозицискиот СДСМ деновиве во неколку наврати беше побарана одговорност и смена на Тапанџиоски од функцијата директор, а неговите изјави беа оценети како лаги.

И на вчерашната прес-конференција од СДСМ изјавија дека изјавата на Тапанџиоски била обид за манипулација со граѓаните. СДСМ ја повика Владата да почне да работи на вистински реформи кои ќе донесат реални инвестиции и вработувања, за што секогаш ќе ја имаат поддршката на опозицијата. Повод за вчерашниот прес, според портпаролот Емилијан Станковиќ, е изјавата на Тапанџиоски дека за време на мандатот на минатата влада, како службеник во Агенцијата, наводно под присила, избришал 18 илјади невработени лица, меѓу кои имало и веќе починати граѓани, како и невработени заминати на службен пат. Од СДСМ прашуваат, од кога починати граѓани се евидентираат како невработени и како невработени лица одат на службен пат.

„Конференцијата што ја одржаа Тапанџиоски, вицепремиерот Зоран Ставрески и министерот за финансии, Трајко Славески, е врв на пирамидата лаги на ВМРО - ДПМНЕ во последните девет месеци“, потенцира Станковиќ. (М.Т.)