Во Подгорица отворен првиот трговски центар „Делта сити“
Српската компанија „Делта холдинг“ го отвори првиот трговски центар „Делта Сити“ во Подгорица, еден од најголемите трговски центри не само во Црна Гора, туку и во регионот пошироко. Молот е на две нивоа со вкупна површина од 48.000 квадратни метри, а малопродажниот простор и забавните содржини заземаат 24.000 квадрати. Вредноста на инвестицијата на „Делта“ изнесува 60 милиони евра, додека инвестициите на партнерите на холдингот во закупениот деловен простор се дополнителни 12 милиони евра. „Делта сити“ претставува комбинација од разновидни малопродажни објекти и забавни содржини. Во него ќе бидат отворени повеќе од 1.200 нови работни места, а за посетителите се обезбедени 1.000 паркинг-места. „На сите политички лидери им порачувам да создадат единствен економски простор во регионот, бидејќи е тоа единствен начин народите да живеат подобро“, рече претседателот на „Делта холдинг“, Мирослав Мишковиќ, на свеченото отворање на објектот.
Во присуство на премиерите на Црна Гора, Србија и на Република Српска, тој подвлече дека во регионот се' уште има земји кои не се отворени за странски инвестиции. (Б.А.) |
