Претходен број

Потребни се најмалку три милијарди евра инвестиции во енергетиката

Експертите повторно ја оценуваа Стратегијата за развој на енергетиката

Енергетските проблеми во земјава може да се решат само со употреба на лигнитот и нуклеарната енергија, а сите други ресурси, како што е природниот гас, се ограничени. Ова е еден од ставовите изнесен на вчерашната седница на Асоцијацијата во Стопанската комора на Македонија, на која беше презентирана Нацрт-стратегијата за развој на енергетиката во Македонија за периодот 2008-2020 со визија до 2030, изготвена од МАНУ.

„Потребни се минимум три милијарди евра и од седум до десет години за да се реши проблемот со непречено снабдување со електрична енергија во Македонија. Рудникот ’Суводол‘ е на крајот на експлоатацијата и од огромно значење е во краток период да се направи стратегија како да се супституира главниот извор на лигнит кој во изминатиов период задоволуваше од 65 до 70 отсто од производството на електрична енергија во Македонија. Сметам дека е битно 51 отсто од потребните три милијарди евра да ги финансира државата, а останатите средства да се обезбедат од странски инвеститори“, рече Хаџимишев.

Тој додаде дека треба да се види и можноста државата да инвестира во изградба на нови 100-150 километри гасовод, имајќи ги предвид бенефитите колку струја може да се произведе од гасот иако, како што кажа, гасот не може целосно да ги реши проблемите во енергетскиот сектор.

Според Илија Спироски од „ЕВН Македонија“, стратегијата е фокусирана на претпоставени состојби, наместо на решавањето на проблемите во енергетскиот сектор. Тој препорача да се изготви програма за реализација на стратегијата, а во спротивно, како што рече, нема да се остварат нејзините цели.

Реплицирајќи му, академик Томе Бошевски рече дека стратегијата дава насоки за развој, а не ги решава проблемите.

„Стратегијата треба да не' придвижи од летаргијата што трае 20 години и да почне да се инвестира во овој сектор, од кој досега само се одвоија 200 милиони евра од продажбата на поранешното ЕСМ кои се искористија за други намени. Дојдени сме до критична точка, бидејќи нашите електрани се на крајот на својот век. Не можеме да се надеваме дека со концесии или странски инвестиции ќе го решиме проблемот. Мора државата да има инвестициски фонд за енергетскиот сектор и ЕЛЕМ да се оспособи на економска основа да може да гради нови производствени капацитети“, рече Бошевски.

За реализација на стратегијата, треба да се обезбедат четири милијарди евра за сценариото без атомска централа, а пет милијарди евра за сценариото со атомска централа. Од нив, до 2020 година треба да се реализираат три милијарди евра. (Ек.Р.)