Претходен број

Антикорупциска бара да сопрат новите вработувања

Констатиравме дека најмногу барања за вработувања има во здравството, изјави Мирјана Димовска

„Не се дозволени нови вработувања додека траат изборите. Ова е законски режим на однесување што важи од моментот на распишувањето избори се' до конституирањето нова влада“, изјави вчера на прес-конференција претседателката на Антикорупциската комисија, Мирјана Димовска.

Државната комисија за спречување на корупцијата упати предупредување до институциите во државата кои располагаат со јавни пари да сопрат со вработувањата и најави дека ќе бидат под постојан мониторинг.

„Во овие избори првичен впечаток е дека во игра се многу вработувања. Од предметите по кои работиме, констатиравме од јавните огласи оти се бараат 434 извршители. Од нив, 157 се во здравството“, потенцира Димовска.

ДКСК, по иницијатива на Советот за радиодифузија, во врска со настапите на министерот Лазар Еленовски емитувани на телевизиите А1 и Канал 5 на 30 мај, побарала информација од медиумите за тоа кој го нарачал емитуваниот спот објавен во времето за платена политичка програма и кој го платил неговото емитување. Одговорите на овие прашања, според Димовска, се пресудни за утврдување за каков вид политичко рекламирање станува збор.

Постапувајќи по претставка од областа на денационализација доставена од повеќе лица, ДКСК има поднесено иницијатива за поведување постапка за кривично гонење раководни службени лица од Министерството за финансии - Одделение во Општина Чаир и од Државниот завод за геодетски работи. Лицата се осомничени за злоупотреба на службените овластувања, бидејќи спротивно на законските прописи отуѓиле имот кој бил предмет на денационализација. (К.Ч.)