Претходен број

Канал 77 со најизбалансирано известување за изборите

МТВ 1, МТВ 2 и Сител отворено ги фаворизирале владејачките партии

Советот за радиодифузија вчера на прес-конференција ги објави првичните резултати од медиумското покривање на предвремените парламентарни избори.

Според овие резултати, најголема неизбалансираност во известувањето за време на изборната кампања е забележана кај МТВ 2 -Програма на албански јазик, МТВ 1 и Телевизија Сител, додека најизбалансирано известувало Радио Канал 77. Кај МТВ 2 - Програма на албански јазик е забележена драстична неизбалансираност во корист на ДПА, додека кај МТВ 1 и Телевизија Сител во корист на коалицијата „За подобра Македонија“.

„Другите радиодифузери беа избалансирани, иако и кај некои од нив е забележана одредена неизбалансираност. Советот за радиодифузија ќе упати укажување со препорака како да не се повтори ваквата неизбалансираност во другите изборни процеси“, рече претседателот на Советот, Зоран Стефановски.

Најчести прекршувања што ги забележал Советот за радиодифузија кај електронските медиуми за времетраење на изборната кампања биле користењето ТВ-програма што не е поврзана со изборите, а била во нивна функција, емитување огласи и реклами на органите на власта, учество на малолетни лица во платено политичко рекламирање, користење посебни информативни емисии во форма на интервјуа за политичко рекламирање и објавување резултати од јавно мислење по 26 мај. Во текот на изборната кампања, Советот изрекол вкупно 36 мерки согласно со Законот за радиодифузна дејност и 118 мерки согласно со Упатството за медиумско претставување.

Констатирани се и вкупно 19 прекршувања на изборниот молк, односно на 31 мај молкот го прекршиле МТВ 1, МТВ 2 - Програма на албански јазик, Македонско радио - Прва програма, ТВ Сител, ТВ Шутел, ТВ Здравкин од Велес, ТВ Кис од Тетово, ТВ Гурра од Кичево и ТВ Нова од Гевгелија. На 1 јуни молкот го прекршиле ТВ Сител, ТВ А1, ТВ Алсат М, Радио Канал 77, ТВ Скајнет, ТВ БТР и ТВ МТМ од Скопје, ТВ Нова од Куманово и ТВ Кис од Тетово.

За изборите најмногу известувала МТВ 1 со 19 часа, 45 минути и 35 секунди, а од комерцијалните медиуми Телевизија Алсат М со 10 часа, 26 минути и 43 секунди, додека најголем обем на политичко рекламирање е емитувано на Канал 5 - 25 часа, 45 минути и 46 секунди. (П.Р.)