Претходен број

Велешани со црни балони против загадувањето од Топилницата

Мирен, но и предупредувачки протест што може да се радикализира

ВЕЛЕС - Илјадници црни балони испратија велешани кон небото за да го однесат црнилото од градот. Жителите на Велес запалија и свеќи за покој на душите што ги однесе триесетгодишното загадување од Топилницата.

Велешани масовно го поддржаа протестот на Зелената коалиција со кој сакаат на надлежните институции да им предочат дека еден мора да си оди - или граѓаните на Велес или Топилницата. Здравјето не смее да биде на продажба, беше пораката од тивкиот марш на граѓаните до капијата на Топилницата.

„Ако се оглушат на она што го бараме, ако се оглушат на отпорот, ако повторно кажат дека ние не сме гледале во иднината, туку тие, тогаш ќе донесеме 101 багер и ќе ја урнеме Топилницата“, се закани Ненад Коциќ од Зелената коалиција.

Граѓаните на Велес велеа дека дошле на протестот за да им дадат на знаење на надлежните дека многу животи се изгубени и дека нема да дозволат Топилницата повторно да проработи на старата локација со истата технологија.

„Вечерва му требаме на нашиот Велес за да ги растераме оловните облаци над градот и да им го избистриме матниот поглед на трговците со човечки души. Ние ја плативме цената, и тоа со леукемии, канцери, бели сандаци за штотуку родени дечиња“, вели Александар Кукулев од Зелената коалиција. „Минеко, оди си“, беа пораките од коалицијата.

Протестот беше мирен, но и предупредувачки. Организаторите најавија радикализација доколку на 17 јуни биде познат новиот сопственик на Топилницата кој нема да сака да го слушне гласот на народот.

„Се гордеам со моите сограѓани. Тие како многу пати досега покажаа дека знаат да бидат прогресивни. Ова е порака до државните институции и до сопствениците на Топилницата дека има работи кои се поважни од профитот, а тоа се здравјето и животот“, потенцира Аце Коцевски, градоначалник на Општина Велес.

Од Зелената коалиција порачаа дека на Велес очајно му се потребни странски инвестиции, економски капацитети и нови вработувања, но не по секоја цена. Ако новите сопственици на Топилницата ги третираат велешани како робови, повторно ќе има протести, но Велес ќе остане на граѓаните. (С.Ќ.Н.)