Тужителите реагираат на текстот „Грција ги плаќа нивните, а во Македонија своите новинари за да помине грчкиот предлог“ објавен во „Вечер“

Најголемиот број од новинарите и членовите на граѓанското здружение „Граѓани за европска Македонија“ вчера се појавија пред скопскиот Кривичен суд каде што преку нивниот правен застапник поднесоа приватна кривична тужба против главниот уредник на весникот „Вечер“, Драган Павловиќ-Латас, поради клевета.

Тужбата против Латас уследи по клеветите што се искажани на нивна сметка во весникот „Вечер“ од минатиот понеделник. Станува збор за текст под наслов „Грција ги плаќа нивните, а во Македонија своите новинари за да помине грчкиот предлог“. Во тужбата, која вчера адвокатот Филип Медарски ја поднесе до судот, наведено е дека текстот во кој е изречена клевета немало потпишан автор и токму поради тоа Павловиќ, како главен и одговорен уредник на „Вечер“, ќе треба да одговара кривично.

Во предметниот текст од 18 јануари, споменувајќи ги сите кои сега се јавуваат како тужители, стои дека „еден од кратерите што плаќа новинари е организиран од фондацијата ’Сорос’, а другиот се вика ’Дијалози за Македонија‘. И двата кратери имаат една цел - притисок врз македонската Влада да се постигне договор по секоја цена“ и дека „... Во Македонија, пак, се плаќаат новинари за ширење пропаганда со која би се помогнало прифаќање на грчките предлози за промена на името на земјава“. За тужителите клеветење претставува и делот од текстот во кој се тврди дека: „новинарите од двата кратера вршеа притисок за одреден хонорар, односно за големи суми“.

Како потписници на тужбата против Латас се јавуваат оштетените Никола Гелевски, Бранко Героски, Владимир Милчин, Ивица Антевски, Маја Бојаџиева, Џабир Дерала, Лидија Димова, Гордана Дувњак, Ѓунер Исмаил, Жарко Јордановски, Ема Марковска-Милчин, Ида Протугер и Ерол Ризаов. (Љ.С.)