Тројно зголемено производство на нафта во Албанија

Домашното производство на нафта во Албанија во првото тримесечје од годинава е поголемо за три пати, споредено со истиот период лани. Од нафтените извори во областа Патоз-Маринез, просечното дневно производство изнесува 8.282 барела, или околу 1.400 тони. Во исто време, двојно е повисока и цената на албанската нафта, од 24,73 долари за барел лани, на 47,16 долари годинава. Албанската влада преку нафтената компанија „Албпетрол“ годинава добила во просек по 9,65 долари за барел, врз основа на правото на користење што и' е дадено на приватна компанија за ископ на нафта. Лани владата добивала по 6,61 долар за барел. Поголемата количина од нафтата од изворите Патоз-Маринез се извезени за италијанските рафинерии преку пристаништето Валона. Зголеменото производство и повисоката цена придонеле приходите реализирани од споменатите извори во првото тримесечје да достигнат 35 милиони долари, наспроти ланските 13 милиони долари. (МИА)