| Побарана милионска отштета за скандалот со „Јака табак“
И на повторениот судски процес против 15-темина обвинети во аферата со државните резерви на тутун, државниот правобранител ја повтори висината на отштетното побарување. Имено, Државниот правобранител Ивица Петров и на вчерашното рочиште рече дека државата како отштетно побарување предјавува износ од 161.972.759 денари. Тој не можеше да каже со сигурност дали ќе остане на овој износ, бидејќи паралелно во струмичкиот Основен суд се водеше слична постапка, а овој судски предмет токму по жалба на Правобранителството е на одлучување во Апелациониот суд во Штип. Ова значи дека доколку штипска Апелација ја потврди пресудата на струмичкиот суд, тогаш висината на побаруваната штета може драстично да се намали или, како што тврди одбраната на обвинетите, да се покаже дека со препродажбата на тутунот од стоковните резерви воопшто и нема штета за државата.
Вчерашното судење започна со информација презентирана од Судскиот совет со која се потврдува дека „струмичкиот“ предмет е во Апелациониот суд во Штип, но дека по него повисокиот суд се' уште не се произнел по жалбата на Државното правобранителство.
За аферата со државниот тутун Јавното обвинителство кон крајот на 2007 поднесе обвинение против директорот на Бирото за стоковни резерви, речиси целокупното раководство на редовишки „Јака табак“, против државен правобранител и извршна судијка и комплетната владина комисија. Случајот беше пресуден, но повисокиот суд го врати предметот од почеток. (Љ.С.) |
