Охрид со нов кредит ќе враќа стари долгови

Со нов кредит кај комерцијалните банки Охрид ќе ги враќа старите долгови, реши е��ногласно Советот на Општината. Долговите го попречуваа развојот на општината и го спречуваа влезот во фискална децентрализација. Како што стои во одлуката на Советот, се работи за долгорочно кредитно задолжување во износ од 360 милиони денари, со годишен ануитет за исплата од 15 отсто од буџетот на општината.

Претседателот на Советот на општината, Душко Јаковчески, на вчерашната прес-конференција појасни дека кредитот ќе се искористи за исплата на обврски по извршни решенија со кои е блокирана општинската сметка.

„Според одлуката на Владата, задолжувањето може да биде најмногу до висина на еден буџет. Општина Охрид оди некаде до нешто повеќе од половина буџет. Годишните ануитети исто така со владината одлука е дозволено да бидат 30 проценти, а ние одиме со 15 проценти од висината на буџетот“, рече Јаковчески. Тој нагласи дека задолжувањето нема многу да ја оптовари локалната самоуправа, а ќе биде доволно за да се сервисираат долговите.

Општина Охрид со години се соочува со тешкотии во финансирањето поради наталожените долгови, кои моментално изнесуваат околу седум милиони евра. (К.Ч.)