Син ја претепал мајка си до смрт

РАДОВИШ - За нецели две недели, се случи второ убиство во Радовиш. Седумдесет и осумгодишната Славка Трајчева завчера била пронајдена мртва во семејната куќа на кејот ,,Осми септември“. Нејзиното безживотно тело со видливи траги на насилство го пронашол нејзиниот постар син Цветко Трајчев, кој веднаш повикал лекар, но само констатирал смрт. Тој го пријавил случајот во полиција, со сомневање дека неговиот брат Раде ја убил нивната мајка, која често физички ја малтретирал. Според полицијата, главен осомничен за убиството е помладиот син на Славка, 43-годишниот Раде.

„Здравјето на брат ми му е нарушено. Често ја тепаше мајка ми, иако таа криеше од нас, но соседите ни го кажуваа тоа. Пријавував и во Центарот за социјални работи и во полицијата, но никој не презеде мерки досега“, вели Цветко, постариот син на Славка Трајчева.

И соседите вчера го потврдија физичкото малтретирање. Според нив, секогаш кога од куќата на Трајчеви се слушала гласна музика, знаеле дека Раде ја тепа мајка му.

Осомничениот е приведен и предаден на истражен судија,а телото на починатата е предадено на обдукција. Истрагата е во тек. (Е.П.)