Без задоволни лекари, нема задоволни пациенти
„Без задоволни лекари, нема задоволни пациенти“, е пораката на најхуманиот лекар во државата д-р Данче Балаловски, инфектолог од Општата болница во Битола што им ја упати на здравствените власти, но и на еснфаските организации на лекарите. Д-р Балаловски се надева дека Лекарската комора, Македонското лекарско друштво и Синдикатот за здравство ќе изнајдат најповолно решение за подобрување на статусот на лекарите во државата. Тој избегна да даде оцена за реформите во здравството, па само кратко одговори дека „реформите во здравството се комплексен проблем“, на вчерашното доделување на наградата „Лекар на годината за 2010 година“, што ја доделува Лекарската комора по 19 пат.
За него, наградата „Св. Наум Охридски“ има посебна тежина, посебно што доаѓа од еснафот. „Наградата е сатисфакција за 30-годишното искуство како лекар, за мојата контунирана медицинска едукација како лекар и посветеност на здравјето на пациентите, но и за едукација на младите кадри и пренесување на моето знаење“, изјави д-р Балаловски. Признанието лекар на годината, меѓу другото, како што вели д-р Балаловски, го добил и за добро справување со две епидемии, епидемијата на заушки во 2009 година и ланската епидемијата на свински грип. „За три месеци во Инфективното одделение беа прегледани преку 7.000 болни, од кои 600 беа лекувани на одделението, а само мал дел беа пратени во Скопје“, појасни д-р Балаловски.
За да може и натаму добро да се борат со болестите, д-р Балаловски се надева дека Лекарската комора заедно со Македонското лекарско друштво ќе ја продолжи континуираната медицинска едукација како главен предуслов за стекнување со најсовремени знаења базирани врз медицина на докази, а во интерес на пациентите.
Иако лекарите работат во променети општествени услови во здравството, кој стана многу суптилен сектор, д-р Балаловски вели дека покрај знаењето, хуманоста и етиката се' уште се одлика на голем број лекари. (Ј.Ј.) |
