Цивилното општество и реформите во безбедносниот сектор
СТРУМИЦА - Република Македонија и по Букурешт 2008 година останува доследна на трајната определба, својата иднина да ја остварува како дел од европското семејство и НАТО.
Ова е една од поентите на работилницата „Цивилното општество и реформите во безбедносниот сектор“ што се одржа во Струмица, во организација на Центарот за демократија и безбедност од Скопје.
„Македонија мора и во иднина да го продолжи својот реформски курс во сите области, вклучително и во безбедносниот сектор. Реформата на безбедносниот сектор, која треба да ги опфати сите негови делови, е показател за демократскиот капацитет на државата, владеењето на правото и почитувањето на основните човекови слободи и права“, истакна м-р Атанас Козарев од Центарот за демократија и безбедност.
На работилницата учествуваше и амбасадорот на Унгарија во Македонија, Кекеши, кој ги пренесе искуствата од неговата земја во зачленувањето во НАТО и во ЕУ.
„За десет години станавме членка на НАТО, а за петнаесет години членка на ЕУ. Имавме широк консензус во државата околу главните политички цели, како што се евроатланските интеграции. До зачленувањето во НАТО моравме да ги средиме нашите односи со соседите и јавно да кажеме дека сме против промени на постојните граници. Но, и да истакнеме дека ќе се грижиме за унгарското малцинство во соседните земји каде што живеат околу пет милиони наши граѓани“, истакна унгарскиот амбасадор. (Е.П.) |
