Петто спомен-обележје за бранителите на Карпалак
ТЕТОВО - Со пригодно чествување на загинатите десет бранители во конфликтот од 2001 година, во саботата на банкина од автопатот Скопје-Тетово беше поставено спомен-обележје. Оваа е петта по ред спомен-плоча што се поставува на местото на тешката трагедија од 8 август 2001 година. Четири пати непознати бандити во ноќно време го кршат спомен-обележјето. Овој пат, заменик-министерот, Емил Димитриев, побара да престанат вандалските посегања со што „ќе престанат и малтретирањата на семејствата на загинатите“.
„Сквернавењето на спомен-обележјето, свесно или несвесно, од ниеден аспект не е оправдано, особено од религиозен и се посега по почитта спрема мртвите. Буди непријатни чувства и не оди во прилог на градење граѓанско општество. Конфликтот е зад нас и ќе остане во колективната меморија на сите граѓани, а постконфликтните случувања не водат кон залечување на раните“, истакна Емил Димитриев.
Првата спомен-плоча на Карпалак ја постави Здружението „Карпалак“ од Прилеп во 2002 година. На влез во кањонот на 8 август 2001 година припадници на ОНА поставија заседа и убија десет припадници на прилепскиот гарнизон на АРМ кои доаѓаа да го бранат Тетово. Во невидениот кошмар и силна оружена акција во која беа нападнати петте возила со 120 резервисти, загинаа: Ноне Наумоски, Сашо Китаноски, Бранко Секулоски, Горан Миноски, Марко Деспотоски, Ердоган Шабаноски, Љубе Грујоски, Дарко Велјаноски, Пеце Секулоски и Веби Рушидоски. (Г.Е.)
|
